د پاکستان نوموتي ژورنالیست نجم سیټهي ویلي، په افغانستان کې د پاکستان هوايي بمبارۍ تر اوسه د پام وړ پایلې نه لري او اسلاماباد لا هم له جدي امنیتي ننګونو سره مخ دی.
سیټهي ویلي، افغانستان او هند به د پاکستان لپاره اوږدمهاله ستراتیژیکې ننګونې پاتې شي.
د هغه په وینا، افغانستان خپله سیمهییزه تګلاره پر مخ وړي، روسیه د طالبانو له حکومت سره اړیکې پراخوي او د چین هڅې هم تر اوسه د پام وړ بدلون نه دی راوستی.
نوموړي ویلي، پاکستان ښايي نور پوځي اقدامات او هوايي بریدونه هم ترسره کړي، خو یوازې پوځي فشار د ستونزو د حل لپاره کافي نه دی او د بمباریو اغېز محدود دی.
سیټهي زیاته کړې، پاکستان تر هغو خپلې اساسي امنیتي ستونزې نه شي هوارولای، څو له هند سره د اوږدمهاله تفاهم او ثبات لپاره کومه حللاره پیدا نه کړي.
هغه همداراز ویلي، پاکستان ډېر ځله د سختو پرېکړو او قاطع اقداماتو خبرې کوي، خو په عملي ډګر کې یې پایلې تل د اعلانونو له کچې سره برابرې نه وي.
