د افغانستان پخواني ولسمشر حامد کرزي د کرېکټ ملي لوبډلې د پخواني تېز توپاچوونکي شاپور ځدراڼ پر مړینه ژوره خواشیني څرګنده کړې او هغه یې د افغان کرېکټ له لومړنیو او اغېزناکو ستورو څخه یاد کړی دی.
کرزي په خپل پیغام کې ویلي، شاپور ځدراڼ د افغانستان د کرېکټ د ودې او پیاوړتیا لپاره نه هېرېدونکې هڅې کړې او د ملي لوبډلې په بریاوو او نړیوال شهرت کې یې مهم رول لوبولی دی.
هغه د شاپور ځدراڼ مړینه د هېواد د ورزش لپاره ستره ضایعه بللې او د نوموړي له کورنۍ، دوستانو او د افغانستان له خلکو سره یې خپله ژوره خواخوږي څرګنده کړې ده.
حامد کرزي د مرحوم شاپور ځدراڼ روح ته د مغفرت او جنت دعا کړې او د هغه کورنۍ ته یې د صبر او زغم غوښتنه کړې ده.
شاپور ځدراڼ د افغانستان د کرېکټ ملي لوبډلې له مخکښو چټکو توپاچوونکو څخه و، چې د اوږدې ناروغۍ له امله د ۳۸ کلونو په عمر وفات شو.
