رویټرز وايي، که څه هم پلان شوی و چې د ایران او امریکا پلاوي په دوحه کې وګوري، خو تهران اعلان کړی چې په راتلونکو ورځو کې به د دواړو هېوادونو ترمنځ هېڅ مستقیمه ناسته ترسره نه شي.
د ایران د بهرنیو چارو وزارت ویلي چې د دغه هېواد د فني پلاوي سفر قطر ته له امریکایي لوري سره د خبرو یا ملاقات لپاره نه دی او نه هم په سیاسي یا فني کچه د واشنګټن سره کومه ناسته پلان شوې ده.
دا وضعیت په داسې حال کې رامنځته کېږي چې د جون د ۱۷مې د لنډمهاله هوکړې د پلي کېدو هڅې لا هم له ابهام سره مخ دي.
دواړه لوري یو بل د ژمنو په سرغړونې تورنوي او د تاوتریخوالي د کمولو هڅې نیمګړې پاتې دي.
هممهاله راپورونه ښيي چې د هرمز تنګي د مدیریت او د تاوتریخوالي د کمولو په اړه اختلافونه لا هم دوام لري.
په واشنګټن کې امریکایي چارواکو ویلي چې د دوحې احتمالي غونډه «ممکن مهمه وي یا نه وي»، خو ټینګار یې کړی چې د ایران د اټومي وسلو د ترلاسه کولو مخنیوی د امریکا د بهرني سیاست اساسي لومړیتوب دی.
