د جماعتالاحرار وسله والې ډلې د پاکستاني چارواکو هغه ادعا رد کړې چې ګواکې یادې ډلې د افغانستان له خاورې د پاکستان پر ضد بریدونه ترسره کړي دي.
دې ډلې په خپره کړې اعلامیه کې ویلي، د دوی ټول جنګیالي، امکانات او عملیاتي جوړښت د پاکستان دننه دي او خپل بریدونه هم له هماغه ځایه پلان او عملي کوي.
جماعتالاحرار همداراز د پاکستان پوځ تورن کړی چې د افغانستان د خاورې د کارونې ادعاوې د خپلو امنیتي ناکامیو د پټولو لپاره مطرح کوي.
په اعلامیه کې راغلي، که د پاکستان پوځ د دوی پر وړاندې د مبارزې وړتیا لري، نو د افغانستان پر خاوره د بریدونو پر ځای دې د پاکستان په لویو ښارونو، په ځانګړي ډول اسلاماباد کې، ورسره مخامخ مقابله وکړي.
د يادونې وړ ده چې جماعت الاحرار وسله واله ډله پاکستان د هند په ملاتړ تورنوي.
