د طالبانو د حکومت ویاند ذبیح الله مجاهد ویلي، د پاکستان سره د روان کړکېچ د حل لپاره لومړیتوب خبرو اترو ته ورکول شوی او هڅه روانه ده چې وضعیت د دواړو لورو له کنټروله ونه وځي.
مجاهد په یوه تازه مرکه کې ویلي، که د پاکستان له لوري هوايي بریدونه دوام پیدا کړي، نو په کابل کې د پاکستان د سفارت د تړلو احتمال هم د حکومت د احتمالي اقداماتو له ډلې ګڼل کېدای شي.
نوموړي یو ځل بیا د پاکستان د پوځ پر یوې ځانګړې کړۍ نیوکه کړې او ادعا یې کړې چې دغه کړۍ د بهرنیو قدرتونو په هڅونه سیمه بېثباته کوي.
هغه زیاته کړې، د پاکستان عام خلک د افغانستان پر ضد له بریدونو ملاتړ نه کوي او د ملکي وګړو پر مرګژوبله خواشیني څرګندوي.
د هغه په وینا، د طالبانو حکومت په اوسنیو شرایطو کې د زغم او حوصلې له پالیسۍ کار اخلي، خو د روان وضعیت له نږدې څارنې سره به د اړتیا په صورت کې لازم تصمیم ونیسي.
ذبیح الله مجاهد د وروستیو بریدونو د قربانیانو له کورنیو سره خواخوږي څرګنده کړې او ویلي، د دوی حکومت به دا بریدونه بې ځوابه پرېنږدي او په مناسب وخت کې به ورته ځواب ورکړي.
