د افغانستان پخواني ولسمشر حامد کرزي د پکتیا، پکتیکا او کونړ په استوګنیزو سیمو کې د پاکستان د هوايي بریدونو غندنه کړې او هغه یې د افغانستان د ملي حاکمیت ښکاره نقض او د نړیوالو اصولو خلاف عمل بللی دی.
کرزي د دغو بریدونو قربانیانو ته د فردوس جنت، ټپیانو ته د بېړنۍ روغتیا هیله کړې او له زیانمنو کورنیو سره یې خواخوږي څرګنده کړې ده.
نوموړي یو ځل بیا ټینګار کړی چې د پاکستان په ګټه دا ده چې د افغانستان پر وړاندې له دښمنۍ او د افراطیت په اړه له دوهګوني سیاست څخه لاس واخلي او له افغانستان سره د ښه ګاونډیتوب او متقابل درناوي پر بنسټ اړیکې او تعامل ته مخه کړي.
