د پاکستان، مصر، سعودي عربستان او ترکیې د بهرنیو چارو وزیران به د جون په ۲۱مه نېټه د مصر په پلازمېنه قاهره کې غونډه وکړي.
د پاکستان د بهرنیو چارو وزارت ویلي چې د دغه هېواد د بهرنیو چارو وزیر محمد اسحاق ډار به د «R-4» ډلې په څلورمه غونډه کې ګډون وکړي.
دا غونډه په داسې حال کې ترسره کېږي چې د ایران او امریکا ترمنځ په سویس کې پلان شوې خبرې ځنډېدلې دي او سیمهییز هېوادونه د وروستیو تحولاتو په اړه د ګډ دریځ د همغږۍ هڅه کوي.
د معلوماتو له مخې، په غونډه کې به د سیمې وروستي سیاسي او امنیتي بدلونونه وڅېړل شي او ګډونوال به د سولې، امنیت او ثبات په اړه خپل نظرونه او وړاندیزونه شریک کړي.
پاکستان ویلي چې دغه ناسته د سیمهییزو ننګونو په اړه د مشورو او همغږۍ لپاره مهمه بلل کېږي، په ځانګړي ډول په داسې وخت کې چې د ایران او امریکا د اړیکو او مذاکراتو راتلونکی پړاو لا هم له ابهام سره مخ دی.
