د اسرائیل د ملي امنیت وزیر ایتامار بنګویر په یوه جنجالي ټویټ کې د لبنان پر وړاندې د سختو اقداماتو غوښتنه کړې او ویلي یې دي چې «د هرې اسرائیلۍ مور د یوې اوښکې په بدل کې باید زر لبنانۍ میندې وژاړي.»
بنګویر ویلي چې د اسرائیلي وګړو او پوځیانو امنیت له هر ډول ملاحظې مهم دی او ټینګار یې کړی چې اسرائیل باید نړۍ ته وښيي چې د دوی د وګړو وینه او امنیت د معاملې وړ نه دي.
نوموړي زیاته کړې چې «ټول لبنان باید وسوځول شي» او د منځني ختیځ د شخړو په اړه یې ویلي چې بریا د زغم او محدودو ځوابونو له لارې نه ترلاسه کېږي، بلکې د ده په وینا باید د وسلهوالو ډلو پر وړاندې قاطع او پراخ اقدامات وشي.
د بنګویر دغه څرګندونو په ټولنیزو رسنیو کې پراخ غبرګونونه راپارولي او یو شمېر منتقدانو یې خبرې پاروونکې بللې دي.
