د امریکا ولسمشر ډونالډ ټرمپ ویلي چې له ایران سره د واشنګټن هوکړه دویم پړاو ته ننوتې او تمه لري چې په بریالیتوب سره به پای ته ورسېږي.
ټرمپ د فرانسې په ایویان-لې-بان ښار کې د جي۷ هېوادونو د غونډې پر مهال وویل چې امریکا په ایران کې هېڅ ډول مالي پانګونه نه کوي او دا ادعاوې ناسمې دي.
هغه زیاته کړه چې د امریکا او ایران ترمنځ هوکړه بشپړه شوې او اوس دویم پړاو ته ننوځي. د نوموړي په وینا، دا پړاو به د پخوانیو خبرو په پرتله اسانه وي.
د امریکا ولسمشر د هوکړې د جزئیاتو په اړه نور معلومات نه دي ورکړي، خو ټینګار یې وکړ چې له ایران سره روانه هوکړه د بریالۍ کېدو چانس لري.
