د پاکستان لومړي وزیر شهباز شریف له افغانستان سره د ډیورند کرښې پر اوږدو د اغزن تار لګولو او د امنیتي تاسیساتو د پیاوړتیا دفاع کړې او ویلي یې دي چې دا اقدامات د هېواد د امنیت او د وګړو د ژوند د خوندیتوب لپاره اړین دي.
هغه د پاکستان ملي اسمبلۍ ته په وینا کې ویلي، چې د پولې د امنیت لپاره د میلیاردونو ډالرو لګښتونه د یوې پراخې امنیتي ستراتیژۍ برخه ده او هدف یې د احتمالي ګواښونو مخنیوی دی.
شهباز شریف زیاته کړې چې حکومت د هېواد د امنیت د تضمین مسؤلیت لري، او له همدې امله د ډیورند کرښې په اوږدو کې د اغزن تار، څارنیزو کامرو او نورو امنیتي زیربناوو جوړول ضروري ګڼي.
د هغه په وینا، دا اقدامات د اوږدمهالې امنیتي تګلارې برخه دي چې هدف یې د سرحدي کنټرول پیاوړتیا او د ناامنیو کمول دي.
