د اسرائیل لومړي وزیر بنیامین نتنیاهو ویلي، تر هغه چې دی د حکومت مشري کوي، ایران به اټومي وسلې ترلاسه نه کړي.
نتنیاهو په اېکس کې په یوه پیغام کې ویلي چې د ایران د اټومي پروګرام په اړه ده خپله او د امریکا ولسمشر ډونالډ ټرمپ بشپړه هوکړه کړې ده.
هغه ادعا کړې چې له درې لسیزو راهیسې د ایران د اټومي پروګرام پر ضد د نړیوالو هڅو په لومړۍ کرښه کې ولاړ دی او که دا هڅې نه وای، ایران به ډېر پخوا د دوی د له منځه وړلو لپاره اټومي بمونه ترلاسه کړې وی.
د اسرائیل لومړي وزیر همداراز ایران د اسرائیل یهودي دولت د له منځه وړلو په هڅه تورن کړ او ویې ویل چې د خپل سیاسي ژوند یوه مهمه موخه یې د دې کار مخنیوی دی.
نتنیاهو دغه څرګندونې په داسې حال کې کوي چې راپورونه ښیي ایران او امریکا په لنډ وخت کې مذاکراتو ته کېني او هوکړه اعلانوي.
