د طالبانو حکومت د برېښنا شرکت وایي چې د کاسا-۱۰۰۰ پروژې عملي چارې د هېواد په بېلابېلو سیمو کې په درېیو پړاوونو کې په چټکۍ سره روانې دي.
د معلوماتو له مخې، دا پروژه د شاوخوا ۱۳۰۰ مېګاواټه برېښنا د لېږد ظرفیت لري او د منځنۍ اسیا برېښنا د افغانستان له لارې سویلي اسیا ته انتقالوي.
برېښنا شرکت زیاتوي چې د پروژې درې واړه پړاوونه د هېواد له شماله تر ختیځو سیمو او تر تورخم پورې غځېدلي، او د برېښنا د لېږد سلګونه ستنې پکې شاملې دي.
د چارواکو په وینا، د دې پروژې له بشپړېدو وروسته به افغانستان هر کال شاوخوا ۶۰ میلیونه ډالر عواید ترلاسه کړي.
کاسا-۱۰۰۰ د سیمې له مهمو انرژۍ پروژو څخه ګڼل کېږي چې د اقتصادي همکاریو او سیمهییز اتصال په پیاوړتیا کې مهم رول لوبوي.
