په پنجشېر ولایت کې د طالبانو د حکومت ځايي چارواکي وایي، په روان کال کې له دغه ولایت نږدې د ګیلاس ۱۳۰ ټنه حاصلات راټول شوي.
د یاد ولایت لپاره د طالبانو د کرنې ریاست وایي، یاده اندازه حاصلات له نږدې ۳۶۳ هکټاره باغونو ترلاسه شوي چې ارزښت یې څه باندې ۱۳ میلیونه افغانیو ته رسیږي.
د یاد ریاست وینا، له دغې ډلې ۲۰ ټنه یې د منځنۍ آسیا هېوادونو ته د صادرېدو لپاره چمتو شوي دي.
دا په داسې حال کې ده چې په دې وروستیو کلونو کې په پنجشېر کې د ګیلاسو د باغونو پراختیا، د بڼوالۍ د فعالیتونو زیاتېدو او د اصلاح شویو نیالګیو وېش د دغې تازه مېوې په محصول کې هم زیاتوالی راوړی.
