د اروپا پارلمان غړې هانا نیومن د طالبانو استازو ته اروپا ته د بلنې پر پرېکړې بیا نیوکه کړې ده.
هانا نیومن په خپله ایکس پاڼه لیکلي چې میلیونونه افغانې نجونې د طالبانو له لوري له زدهکړو محرومې دي، خو په همدې وخت کې د طالبانو استازي اروپا ته بلل کېږي.
نوموړې ویلي، دا اقدام هغو افغانانو ته چې د خپلو حقونو لپاره مبارزه کوي او همدارنګه هغو استبدادي رژیمونو ته چې د اروپا سیاستونه څاري، ناسم پیغام لېږي.
نوموړې دا څرګندونې وروسته له هغې مطرح کوي چې د رسنیو د راپورونو له مخې، اروپایي ټولنه د کډوالۍ او ځینو تخنیکي موضوعاتو په اړه د خبرو لپاره د طالبانو د یوه پلاوي د بلنې چمتووالی نیسي. اروپایي چارواکي وایي، دا خبرې د طالبانو د حکومت د رسمیت پېژندلو معنا نه لري، خو دغه پرېکړه له نیوکو سره مخ شوې ده.
