د پښتون ژغورنې غورځنګ د یوې اعلامیې په خپرولو سره ویلي، چې د دغه غورځنګ پر ضد د «مجرمانه رنګ» ورکولو یو منظم او پلان شوی کمپاین روان دی، چې دا ځل د یوې سیاسي ډلې له لوري مخته وړل کېږي.
د پښتون ژغورنې غورځنګ د مرکزي اطلاعاتو په خپره شوې اعلامیه کې راغلي، چې تر دې وړاندې هم برېتانوي استعماري نظام د پښتنو او د برصغیر د نورو محکومو قومونو پر ضد ورته تګلارې کارولې وې، او د هماغه استعماري میراث دوام اوس هم د بېلابېلو څېرو له لارې روان دی.
اعلامیه زیاتوي، سیاسي اختلافات خپل ځای لري، خو یو ولسي تحریک ته مجرمانه بڼه ورکول او د پولیسو د مخبرانو په څېر چلند کول د منلو وړ نه دي.
یاد غورځنګ دغه روان کمپاین د یوه پراخ استعماري اجنډا برخه بللې او ویلي یې دي، چې موخه یې د پښتنو د حقیقي غږ خاموشه کول او بدنامول دي.
د غورځنګ په وینا، «تاریخ به هېڅکله هغه کسان ونه بښي چې د پښتنو د اصلي غږ په ځپلو کې رول ولوبوي.»
د پښتون ژغورنې غورځنګ ټینګار کړی، چې دغه غورځنګ د پښتنو یوه حقیقي ولسي مبارزه ده او د پښتني سیمو پر ضد د استعماري جګړې پر وړاندې به خپل غږ پورته کولو ته دوام ورکوي.
وړاندې تر دې، د عوامي نیشنل ګوند مشر ایمل ولي خان د پښتون ژغورنې غورځنګ د ټيټيپي وسله والې ډلې سره مقایسه کړی و، او ویلي یې وو، چې د پښتون ژغورنې غورځنګ، تحریک انصاف او ټيټيپي یوه بڼه ده او له یوه لورې فعالیت کوي.
