د ایران د حکومت ویاندې فاطمې مهاجراني ویلي، تهران د سولې له ډیپلوماټیکو هڅو سره سره لا هم “پوځي چمتووالی” ساتلی او د هر ډول احتمالي جګړې لپاره تیار دی.
هغې نن سې شنبه خپلې اوونیزې خبري غونډې ته وویل، ایران له “نړۍ تر ټولو ستر پوځي ځواک” سره ۴۰ ورځې جګړه کړې او اوس هم د مذاکراتو د برخلیک روښانه کېدو ته انتظار باسي.
مهاجراني همداراز وویل، حکومت انټرنېټ ته لاسرسی د خلکو “مدني حق” ګڼي او په ایران کې به انټرنېټي خدمات هغه مهال بېرته عادي شي چې د امریکا او اسراییل جګړه پای ته ورسېږي.
نوموړې ټینګار وکړ چې د ایران اساسي تګلاره “تلپاتې سوله” ده او ډیپلوماسي د “عزت، حکمت او مصلحت” پر اصولو روانه ده.
فاطمه مهاجراني ویلي، وروستۍ جګړې د هېواد د پتروشیمي او فولادو صنعتونو ځینې برخې زیانمنې کړې دي، خو حکومت د بیو د لوړېدو د مخنیوي او اقتصادي ثبات لپاره ځانګړي پلانونه چمتو کړي دي.
