څلور ساعته وروسته له دې چې ډونالډ ټرمپ د ایران پر وړاندې د دوه اوونیو لپاره د بریدونو د درولو اعلان وکړ، د اسراییل د لومړي وزیر بنیامین نتانیاهو دفتر د امریکا او ایران ترمنځ د اوربند هرکلی کړی؛ خو ټینګار یې کړی چې دا اوربند، د ځینو پاکستاني منځګړو ادعاو برعکس، لبنان ته نه پراخیږي.
په هغه اعلامیه کې چې یوازې په انګلیسي خپره شوې، ویل شوي چې اسراییل د ټرمپ د پرېکړې ملاتړ کوي؛ خو په دې شرط چې تهران سمدستي هرمز تنګي پرانیزي او د امریکا، اسراییل او د سیمې پر ټولو هېوادونو بریدونه ودروي.
اعلامیه همدارنګه وايي چې اسراییل د امریکا د هڅو ملاتړ کوي څو ډاډ ترلاسه کړي چې ایران نور د امریکا، اسراییل، عرب ګاونډیو او نړۍ پر وړاندې هستهییز، توغندیز یا ترهګریز ګواښ نه جوړوي.
د نتانیاهو دفتر زیاته کړې چې امریکا اسراییل ته ډاډ ورکړی چې په راتلونکو خبرو کې د دې اهدافو د ترلاسه کولو ژمنه کوي.
په پای کې بیا ټینګار شوی چې د دوه اوونیو اوربند لبنان ته نه پراخیږي.
