د طالبانو حکومت تر واک لاندې د کندهار د اطلاعاتو او کلتور ریاست مسوولین وايي، چې د احمدشاه بابا د تاریخي کور د ترمیم او بیارغونې پر مهال د احمدشاهي دورې درې مهم تاریخي اثار ترلاسه شوي دي.
دغه موندنې چې یو ډبرین پلیتهیي څراغ، یو خاورین څراغ او یو فلزي ځنځیر پکې شامل دي، د مسوولینو په وینا د څو پېړیو زړې بېلګې دي او د ودانۍ تاریخي ارزښت نور هم پیاوړی کوي.
د ریاست په خبره، موندل شوي اثار به له پاک کارۍ او ترمیم وروسته د احمدشاه بابا د کور په موزیم کې د احمدشاهي دورې له نورو ارزښتناکو توکو سره یو ځای، ځای پر ځای او نندارې ته وړاندې شي.
