د ترکیې د بهرنیو چارو وزیر، هاکان فیدان د غزې د اوربند د روان وضعیت په اړه اندېښنه څرګنده کړې او ویلي یې دي چې د اسلامي هېوادونو د بهرنیو چارو وزیران به د دوشنبې په ورځ په استانبول کې سره وګوري.
فیدان ویلي چې دا غونډه به د هغو هېوادونو وزیران راټول کړي چې د سپتمبر په غونډه کې له ولسمشر ټرمپ سره په نیویارک کې حاضر وو.
په هغه ناسته کې ترکیه، قطر، سعودي عربستان، مصر، امارات، اردن، پاکستان او اندونیزیا ګډون کړی و.
د ترکیې د بهرنیو چارو وزیر په وینا، اوسنی بحث د اوربند له لومړۍ مرحلې وروسته د «ثبات د ځواک» پر جوړښت او ترتیباتو متمرکز دی.
په همدې حال کې، د اسرائیلو صدراعظم بنیامین نتانیاهو تېره اوونۍ ویلي چې په غزه کې د اوربند د څار د ماموریت په چوکاټ کې د ترکیې د امنیتي ځواکونو هر ډول رول ردوي.
