د پاکستان د کورنیو چارو وزیر محسن نقوي ملي شورا ته ویلي، چې سعودي عربستان په تېرو ۱۶ میاشتو کې ۵۰۳۳ پاکستانیان، چې زیاتره یې سوالګر وو، شړلي دي.
ډان ورځپاڼې راپور ورکړی، چې له سعودي عربستان سربېره، په پنځو نورو هېوادونو کې ۳۶۹ نور کسان هم د سوال په تور نیول شوي او راشړل شوي دي.
د معلوماتو له مخې، له ۲۰۲۴ کال راهیسې تر اوسه ۵۴۰۲ پاکستانیان له سعودي عربستان، عراق، مالیزیا، عمان، قطر او اماراتو څخه شړل شوي، چې تر ټولو زیات یې د سند ایالت اوسېدونکي دي چې شمېر یې ۲۷۹۵ ته رسېږي، او پنجاب ته ۱۴۳۷ کسان شړل شوي دي.
وزیر یوازې د ۲۰۲۴ وروسته معلومات وړاندې کړي، که څه هم پارلمان ترې درې کلن راپور غوښتی و.
