د پاکستان لومړي وزیر شهباز شریف ویلي، د سولې د یوې مهمې هوکړې د وروستۍ کېدو لپاره پرمختګ شوی او ښایي د راتلونکو ۲۴ ساعتونو په ترڅ کې یې وروستۍ بڼه بشپړه شي.
شهباز شریف په اېکس په تازه ځړونه کې ویلي چې پاکستان د سولې د هوکړې د برېښنايي لاسلیک لپاره چمتووالی نیسي او له هغې وروسته به راتلونکې اوونۍ د تخنیکي کچې خبرې هم ترسره شي.
نوموړي د خبرو اترو په بهیر کې د امریکا او ایران د دوامدار ملاتړ او ژمنتیا ستاینه کړې او د سیمې له نورو هېوادونو یې هم د ملاتړ لپاره مننه کړې ده.
د پاکستان لومړي وزیر زیاته کړې چې دوی باور لري دا احتمالي تاریخي هوکړه به د تلپاتې سولې لپاره یو قوي بنسټ کېږدي.
شهباز شریف د دې سولې د هوکړې د جزئیاتو او د ښکېلو لورو په اړه نور معلومات نه دي ورکړي.
