د طالبانو حکومت د صنعت او سوداګرۍ وزير نورالدین عزیزي ويلي، د افغانستان او قزاقستان ترمنځ سوداګریزه راکړه ورکړه د تېر کال په پرتله ۴۱ سلنه او د تېرو درېیو کلونو په موده کې نږدې ۱۰۰ سلنه زیاته شوې ده.
نوموړي په کابل کې د افغانستان او قزاقستان د ګډ سوداګریز نندارتون د پرانیستې پر مهال ویلي چې دواړه هېوادونه کولای شي د درې میلیارده ډالرو کلنۍ سوداګرۍ هدف ته ورسېږي، خو د دې لپاره د بانکي همکاریو، ټرانزیټي اسانتیاوو، لېږد رالېږد او پانګونې په برخو کې لا ډېرو پرمختګونو ته اړتیا ده.
عزیزي زیاته کړې چې د دواړو هېوادونو اقتصادي اړیکې په وروستیو کلونو کې د پام وړ پراخې شوې او د سوداګرۍ کچه په دوامداره توګه لوړېدونکې ده.
په همدې غونډه کې د قزاقستان د اقتصاد وزیر سیریک ژومانګارین افغانستان د سیمې د نښلونې مهم مرکز بللی او ویلي چې هېواد یې په بېلابېلو اقتصادي او سوداګریزو برخو کې د پانګونې او همکاریو پراخولو ته لېوالتیا لري.
