د امریکا سپینه ماڼۍ پر اسرائیلي لومړي وزیر بنیامین نتنیاهو فشار راوړی چې په اشغال شوې لوېدیځه غاړه کې د اسرائیلي مېشتو له لوري د فلسطینیانو د کورونو محاصره په ښکاره وغندي.
د راپورونو له مخې، د قُصرې په کلي کې اسرائیلي مېشتو درې فلسطیني کورونه محاصره کړي، د اوسېدونکو د تګ راتګ مخه یې نیولې او د اوبو او برېښنا رسونه یې پرې کړې ده. په دغو کورونو کې د یوه فلسطیني-امریکايي کور هم شامل دی.
اسرائیلو کې د امریکا سفیر مایک هکابي مخکې د دغې محاصرې عاملان «اسرائیلي ترهګر» بللي وو.
په همدې حال کې، اسرائیلي پوځ سیمې ته اضافي ځواکونه استولي او ادعا یې کړې چې د اوسېدونکو د ساتنې او امنیت لپاره یې اقدام کړی دی.
نتنیاهو تر اوسه په عامه توګه د دغې پېښې په اړه څرګند دریځ نه دی نیولی. د امریکا فشار داسې مهال دی چې په لوېدیځه غاړه کې د اسرائیلي مېشتو پر فلسطینیانو د بریدونو او د ځمکو د نیولو په اړه اندېښنې زیاتې شوې دي.
