د متحده عربي اماراتو، قطر، اردن، اندونیزیا، پاکستان، ترکیې، سعودي عربستان او مصر د بهرنیو چارو وزیرانو د اسرائیلو له لوري د غزې لپاره د امریکا د ولسمشر ډونالډ ټرمپ د ۱۵ مادهییزې سولې نقشې ردول غندلي دي.
دوی په ګډه خبرپاڼه کې ویلي، د اسرائیلو دغه دریځ د سولې د پلان عملي کېدل له خطر سره مخ کوي او د عادلانه او تلپاتې سولې لپاره ګډې هڅې کمزورې کوي.
د بهرنیو چارو وزیرانو ویلي، دغه نقشه د فلسطیني ډلو له خوا منل شوې او په کې د اسرائیلي ځواکونو وتل، د وسلو د له منځه وړلو بهیر، د نړیوال ثبات ساتونکي ځواک ځای پر ځای کېدل او د غزې بیا رغونه شامله ده.
دوی ټینګار کړی چې د اسرائیلو ردول د غزې او د اشغال شوې فلسطینۍ خاورې په نورو برخو کې د سولې د هڅو پر وړاندې خنډ جوړوي.
