د پاکستان د پارلمان پخواني غړي او بلوچ سیاستوال ثناءالله بلوچ ویلي، د بلوچستان او اسلاماباد ترمنځ اصلي واټن یوازې جغرافیایي نه، بلکې د احساس، لیدلوري او لومړیتوبونو واټن دی.
ثنالله بلوچ په یوه خپاره کړي بیان کې د بلوچستان او اسلاماباد ترمنځ شاوخوا ۱۰۰۰ کیلومتره واټن ته په اشارې ویلي، لکه څنګه چې له لوړې ارتفاع د ځمکې شیان ډېر واړه ښکاري، همداسې د اسلاماباد واکمنو ته د بلوچستان ستونزې هم کوچنۍ ښکاري.
هغه ویلي، د بلوچستان بشري، اساسي قانوني او پرمختیايي ستونزې له لېرې نه شي درک کېدای او د سیمې خلک له ګڼو ننګونو، لکه د اوبو کمښت، د ښوونځیو تړل کېدو، بېکارۍ او د بنسټیزو حقونو د نشتوالي سره مخ دي.
سیاستوال ثناءالله بلوچ ټینګار کړی تر هغه چې بلوچستان د سیمې د خلکو له نظره او د هغوی پر خاوره د درېدو له زاویې ونه کتل شي، د دې سیمې ستونزې به په خپل اصلي شدت ونه لیدل شي.
دا په داسې حال کې ده چې دا مهال په بلوچستان کې د سیاسي او امنیتي ګډودیو له امله د بلوڅانو ستونزې او ننګونې تر بل هر وخت زیاتې شوې دي.
