د ترکیې، سعودي عربستان او پاکستان لوړپوړي چارواکي به سبا په استانبول کې د درې واړو هېوادونو د «مکې ګډ دفاعي تړون» له مخې خپله لومړنۍ کمېټې غونډه ترسره کړي.
د رویټرز د راپور له مخې، په غونډه کې به د درې واړو هېوادونو د بهرنیو چارو او دفاع وزیران او د پوځ مشران ګډون وکړي.
د غونډې په اجنډا کې د دفاعي وړتیاوو پیاوړتیا، د درې واړو هېوادونو د وسلهوالو ځواکونو ترمنځ د همغږۍ زیاتول او د دفاعي صنعت په برخه کې ګډ تولید او پراختیا شامله ده.
ترکیې، سعودي عربستان او پاکستان دغه تړون د اګست په اوومه په مکه کې لاسلیک کړی و. د تړون له مخې، پر یوه غړي هېواد وسلهوال برید به پر ټولو درې واړو هېوادونو د برید په توګه ګڼل کېږي؛ دا اصل د ناټو د پنځمې مادې له ګډ دفاعي اصل سره ورته بلل شوی دی.
د ترکیې د بهرنیو چارو وزیر هاکان فیدان مخکې ویلي وو چې دا تړون د کوم ځانګړي هېواد پر ضد نه دی او د نورو هېوادونو د ګډون لپاره هم پرانیستی دی؛ مصر د احتمالي راتلونکي غړي په توګه یاد شوی دی.
