د منځني ختیځ، افغانستان او پاکستان لپاره د برېټانیا وزیر او د پارلمان غړي هېمش فالکونر اسلامآباد ته د خپل سفر په ترڅ کې د افغانستان او پاکستان ترمنځ د خبرو اترو غوښتنه کړې ده.
نوموړي د افغانستان لپاره د پاکستان له ځانګړي استازي محمد صادق خان سره، د لیدنې پر مهال د دواړو هېوادونو ترمنځ د روانو کړکېچونو په اړه خبرې کړي او ټینګار یې کړی چې د ستونزو د حل لپاره ډیالوګ مهم دی.
په دې لیدنه کې د بریټانیا وزیر هېمش فالکونر له افغانستانه د ترهګریز ګواښ پر وړاندې له پاکستانه د ملاتړ د دوام ژمنه هم تازه کړې.
نوموړي زیاته کړې چې د پاکستان او برېټانیا ترمنځ همکاري د دواړو هېوادونو او نړیوال امنیت لپاره مهمه ده او د ترهګرۍ ضد برخه کې به یې له پاکستان سره مرستې دوام وکړي.
