د امریکا د خزانې وزیر سکاټ بېسنټ ویلي، واشنګټن به پر ایران د تاریخ «تر ټولو سخت بندیزونه» ولګوي او موخه یې د ایران د حکومت نسکورول دي.
نوموړي له چین او نورو هېوادونو غوښتي چې د تهران د اقتصادي منزوي کولو په هڅه کې ورسره یوځای شي.
بېسنټ ویلي، د امریکا د فشار کمپاین به د ایران پر وړاندې د سمندري محاصرې او نویو اقتصادي بندیزونو پر ګډ اقدام ولاړ وي او د بندیزونو جزئیات به د اګست په ۲۴مه اعلان کړي.
چین بیا د امریکا دا تګلاره رد کړې او ویلي یې دي چې اضافي بندیزونه به روانې ستونزې لا پسې پېچلي کړي.
چین د ایران د تېلو له مهمو پېرودونکو دی چې د ایران د صادرېدونکو تېلو له ۸۰ سلنې ډېره برخه اخلي.
