د طالبانو حکومت د دفاع وزارت په یوه اعلامیه کې ویلي، چې د «اسلامي امارت» وسلوالو ځواکونو د پاکستان د پوځ له خوا د افغانستان د خاورې د نقض په ځواب کې د ډیورنډ کرښې په اوږدو کې پر پاکستاني امنیتي پوستو انتقامي بریالي عملیات ترسره کړي دي.
اعلامیه کې راغلي، چې دغه عملیات نن شپه په دولس بجې پای ته رسېدلي دي.
یاد وزارت زیاتوي:«که مقابل لوری بیا د افغانستان حریم نقض کړي زموږ وسلوال پوځ د خپل حریم دفاع ته چمتو دی او کلک ځواب به ورکړي.»
د پاکستان حکومت تر اوسه په دې اړه څه نه دي ویلي.
د کندهار په معروف ولسوالۍ کې د طالبانو او پاکستاني پوځیانو ترمنځ له سختې جګړې وروسته د پاکستان یوه سرحدي پوسته د طالبانو لاس ته ورغلې ده.
امنیتي سرچینې وایي چې په دې نښته کې لږ تر لږه شپږ پاکستاني سرتېري وژل شوي او دوه تنه یې ژوندي نیول شوي دي.
سرچینې زیاتوي چې د جګړې پر مهال ګڼ شمېر وسلې او مهمات هم د طالبانو لاس ته ورغلي دي.
د ننګرهار پخواني والي ضیاءالحق امرخېل ویلي، چې نن د افغانانو د ملي یوالي ورځ ده.
هغه په خپله ایکسپاڼه لیکلي، چې نن به ټول اختلافات پریږدو او د هغه چا لپاره به یو کیږو، چې همېش یې د افغانستان د ورکېدو او افغان نظامونو د ړنګېدو لوبه کړې.
نوموړي ویلي:«که اړتیا شي، ډاډ ورکوم، چې د غچ اخیستنې په دې عظیم وخت کې به ټول افغان ځوانان، مشران او کشران ټول ورسره یو ځای سنګر ته درومي.
وطن دې اباد او د افغانستان نوم دې بریالی وي.»
امرخېل داسې مهال دا څرګندونې کوي چې د هېواد په شپږو ولایتونو کې د طالبانو او پاکستاني ځواکونو ترمنځ نښتې روانې دي.
د کانونو او پټرولیم وزارت دلويو کانونو پخوانی مشر محمد امید خُرم په ډیورنډ کرښه د طالب سرتیرو او پاکستاني ځواکونو جګړې ته په اشارې سره وایي باطل پرست پوځ پر وړاندې زموږ د اتلانو جهاد هماغسې مقدس دی لکه څنګه چې د امریکايي ځواکونو پر وړاندې وو.
ښاغلي خرم لیکلي: «باطل پرست پوځ د مسلمان تر پوښښ لاندې د انګریز سیاستونه مخته وړي»
هغه په طالب سرتیرو غږ کړی چې د خپلو ولسونو د مظلومیت غچ نور واخلي.
که څه هم د طالبانو او پاکستاني پوځ ترمنځ د روانې جګړې د تلفاتو په اړه تر اوسه کره معلومات نشته؛ خو د طالبانو حکومت ادعا کوي چې د پاکستاني ځواکونو ګڼې پوستې یې نیولې او تر لسو زیات پوځیان یې وژلي دي.
دوی وایي، اچین کې یې د پاکستاني پوځیانو ځینې جسدونه هم دې غاړې ته را اړولي دي.
پاکستاني لوري تر اوسه د دغو ادعاوو په اړه څه نه دي ویلي.
د طالبانو حکومت تر واک لاندې د ننګرهار ولایت د اطلاعاتو او کلتور ریاست مسولینو رسنیو ته ویلي چې تازه یې د هیواد د ملي وجیبې له مخې د ختیځ ۲۰۱ خالد بن ولید قول اردو ځواکونو له لوري په کونړ او ننګرهار کې پر فرضي کرښه پر پاکستاني ځواکونو سخت بریدونه پیل کړي.
دا مهال د افغان طالبانو لخوا په شپږو ولایتونو کې له پاکستاني ځواکونو سره سخته او درنه جګړه روانه ده.
د افغان سولې په چارو کې د امریکا پخوانی ځانګړی استازی ډاکتر زلمی خلیلزاد په ایکس پاڼې په ډیورنډ کرښه د افغانستان او پاکستان ترمنځ د سختې جګړې خبر ورکړی.
په ورته وخت کې ګڼ شمیر طالب پلوو او د هغوې اړونده رسنیزې برخې په خپلو اکونټونو د «وَاللَّهُ عَزِيزٌ ذُو انتِقَامٍ» پوسټونه کوي.
د هند د بهرنیو چارو وزارت ویلي چې د طالبانو د بهرنیو چارو وزیر امیرخان متقي د مطبوعاتي غونډې پر مهال د ښځینه خبریالانو د ګډون د بندیز په پرېکړه کې هېڅ رول نه لري.
د هندي رسنیو د راپور له مخې، د شنبې په ورځ له دې اعلان وروسته، په هند کې پراخ اعتراضونه او د اپوزیسیون د مشرانو غبرګونونه راپورته شول.
د کانګرس ګوند مشره پریانکا ګاندي وادرا د صدراعظم نرندرا مودي څخه د وضاحت غوښتنه کړې او ویلي یې دي چې دا بېاحترامي ده چې د هند وتلې ښځینه خبریالانې له یوې غونډې وشړل شوې.
همدارنګه د هند پخواني د کورنیو چارو وزیر پي چیدامبرم ویلي چې د ښځینه خبریالانو د منع کېدو پرېکړه د حیرانتیا وړ ده او نارینه خبریالانو ته ښايي له غونډې وتلي وای.
دا پېښه په داسې حال کې شوې چې په افغانستان کې هم د طالبانو له واکمنېدو وروسته، ښځینه خبریالانې له پراخو محدودیتونو سره مخ دي او د ډېرو مهمو خبري غونډو له ګډون بېبرخې شوې دي.
د یادونې ده چې د طالبانو د واکمنۍ له بیا پیل وروسته، دا د امیرخان متقي لومړۍ سفر ده چې هند ته یې ترسره کړی.
په پاکستان کې د ناامنۍ له زیاتېدو سره هممهاله، د تحریک طالبان پاکستان (TTP) ډلې د خیبر پښتونخوا په یوه پوځي روزنیز مرکز د ځانمرګي برید مسؤلیت منلی دی.
د راپورونو له مخې، په دې برید کې ۱۷ پوځي او ۳ ملکي وګړي وژل شوي دي.
دا برید وروسته له هغه وشو چې د پاکستان پوځ په افغانستان کې د TTP پر ځینو مرکزونو، په ځانګړي ډول د کابل او پکتیکا په سیمو کې، هوایي بریدونه وکړل.
د طالبانو حکومت د پاکستان دا هوایي بریدونه تأیید کړي او د احتمالي عواقبو خبرداری یې ورکړی دی.
په همدې مهال، د پاکستان د دفاع وزیر خواجه اصف ویلي چې پوځ به “ترهګر تر افغان خاورې پورې تعقیب کړي.”
وروسته له هغې چې د هند پارلمان غړې ساګاریکا غوث په لومړي وزیر مودي نیوکه وکړه چې ولې د طالبانو د بهرنیو چارو وزیر مولوي امیرخان متقي خبرې غونډې کې د هند ښځینه خبریالانو ته اجازه نه ده ورکړل شوې او دا یې خپل کلتور ته سپکاوی بللی.
د هند پارلمان دغه غړې پر خپل اېکس پاڼې له مودې پوښتلې چې: «د ښځو د حقونو ملاتړ باید یوازې ټاکنیز شعار نه وي »
په ورته وخت کې د کابل پخواني والي احمدالله علیزي هم د هند حکومت څخه غوښتې چې طالبان وهڅوي چې د افغان میرمنو حقوقو ته ژمن پاتې شي او په سیاسي او ټولنیز بهیر کې یې ملاتړ وکړ.
ښاغلي علیزي په خپل ایکس کې لیکلي چې د یو ډیموکراتیک هیواد په توګه باید د افغان میرمنو او ماشومانو د ملاتړ په برخه کې باید ښکاره دریځ ونیسي.