باوري سرچینې وايي، چې د طالب سرتېرو او پاکستاني پوځیانو ترمنځ نښته کې دواړو لوريو ته زیان اوښتی دی.
د معلوماتو له مخې، په دغه نښته کې څلور طالب سرتېري ټپیان شوي دي.
سرچینه د پاکستان لوري ته هم د یو شمېر پوځیانو ټپي کېدل مني؛ خو د کره شمېر په اړه څه نه وايي.
دا نښته نن ماښام مهال د خوست د ځاځي میدان ولسوالۍ اړوند ډېورنډ فرضي کرښې ته څېرمه رامنځته شوې ده.
باوري سرچینې وايي چې نن یو وار بیا د خوست ځاځي میدان ولسوالۍ اړوند ډیورنډ فرضي کرښې ته څېرمه د طالب سرتېرو او پاکستاني ځواکونو ترمنځ نښته شوې.
تر اوسه په دغه نښته کې د تلفاتو په اړه څه نه دي ویل شوی؛ خو ویل کېږي چې نښته د افغانستان په خاوره کې د طالب سرتېرو له لوري د پوستې جوړولو پر سر رامنځته شوې ده.
دا په داسې حال کې ده چې د تېرې چهارشنبې په ورځ هم په دغه سیمه کې د طالب سرتېرو او پاکستاني ځواکونو ترمنځ نښته شوې وه.
له شپږ دېرش میاشتو زیاته موده وشوه چې د له شپږم ټولګي پورته د نجونو پرمخ ښوونځي تړلي دي.
سره له دې چې د طالبانو حکومت وایي، ښوونځي یې تر امر ثاني پورې تړلي؛ خو ۱۰۸۵ ورځې وشوې، چې په دې اړه دویم امر نه دی شوی.
څو ورځې وړاندې د طالبانو حکومت د لوړو زده کړو سرپرست وزیر ندا محمد ندیم ویلي وو چې په دې اړه د علماوو تحقیق روان دی، که روا وې دوی به هم اجازه ورکړي او که روا نه وې؛ نو همداسې به تړلي وي.
د ندیم دغو څرګندونو په کور دننه او بهر د ګڼو علماوو او خلکو غبرګونونه را وپارول.
پخواني ولسمشر حامد کرزي د روغتیا نړیوال سازمان پر هغه راپور اندېښنه ښودلې چې ویلي وو، افغانستان کې د پولیو ناروغي زیاته شوې.
هغه د طالبانو له حکومت غوښتي چې په دې اړه جدي هڅې وکړي.
هغه د دغو ناروغیو اصلي علت د ناروغیو زیاتوالی بللی او د طالبانو په حکومت یې غږ کړی چې د نجونو ښوونځي پرانیزي.
بل لورته کرزي د رسنیو د راپورونو پر اساس لیکلي چې د هېواد په ځینو سیمو کې کور په کور واکسین هم منعه شوي.
د طالبانو حکومت تر کنټرول لاندې د المپیک د بدني روزنې او ورزش کمېټې مسوولینو نن د خپلو یو کلنو لاسته راوړنو تشریح پروګرام کې ویلي چې په تېر یو کال کې یې د افغان ورزشکارانو پر مټ ۹۲ بېلابېل مډالونه ګټلي دي.
د دوی د معلوماتو له مخې، په دغو مډالونو کې ۲۲ د سرو زرو، ۳۰ د سپینو زرو او ۴۰ د برونزو مډالونه شامل دي.
د معلوماتو له مخې، په تېر یو کال کې یادې کمېټې د لوبغاړو ترمنځ څلور زره هڅوونکې ځانګړې او رسمي سیالۍ جوړې کړې دي.
دوی داسې مهال دا څرګندونې کوي، چې څه موده وړاندې یې د افغانستان پر فري فایټ لوبو هم بندیز ولګوو.
د طالبانو حکومت سترې محکمې ویلي چې په میدان وردګو کې یې دوه اوسېدونکو ته په عام محضر کې تعذیري سزا ورکړې ده.
له یادې محکمې څخه په خپره شوې خبرپاڼه کې راغلي، چې یاد کسان د چک ولسوالي اړوند وو.
د معلوماتو له مخې، دغه کسان ۳۹- ۳۹ درې وهل شوي او همدا شان د دوو کالو په بند هم محکوم شوي دي.
بل لورته بامیانو کې هم دوه تنه له کوره د تېښتې په جرم ۳۹-۳۹ درې وهل شوي او د یو کال بند حکم هم پرې شوی دی.
د چین شینهوا خبري اژانس خبر ورکړی چې په دد غه هېواد په هاینان کې د طوفان له کبله ۲ تنه وژل شوي او ۹۲ نور ټپیان دي.
د سرچینې د راپور پر بنسټ، د سختو ورښتونو او تېز باد له کبله خلکو ته درانه مالي زیانونه هم اوښتي دي.
د یادونې ده چې چین کې وخت ناوخت د سختو توپانونو له کبله خلکو ته ګڼ مالي او ځاني زیانونه اوړي.
د امریکا ولسمشریزو ټاکنو ته نوماند ډنالډ ټرمپ یو وار بیا د کډوالو په اړه د بایډن پر پالیسي نیوکه کړې او ویلي یې دي چې د بریا په صورت کې به امریکا ته د کډوالو راتګ په ټپه ودروي.
هغه ویلي، د امریکا په تاریخ کې به د کډوالو د تبعید لوی بهیر پیل کړي.
د ټرمپ په خبره، دی به د امریکا پولې خوندي او له دې لارې به خپل هېواد کې د نشهیي توکو زیاتېدو مخنیوی وکړي.
د یادونې ده چې ټرمپ تر دې وړاندې هم ویلي وو چې د بریا په صورت کې به امریکا ته د کډوالو د راتګ مخه ونیسي.
د ملګرو ملتونو امنیت شورا ۱۲ غړو د طالبانو حکومت د امرباالمعروف قانون په اړه سخته اندېښنه ښودلې.
دوی په یوه ګډه اعلامیه کې ویلي، چې دا قانون د ښځو او نجونو غږ نور هم چوپ کوي.
په اعلامیه کې افغانستان کې جنسي اپارتاید غندل شوی او د طالبانو له حکومت غوښتل شوي چې د ښځو غږ واوري.
دا اعلامیه افغانستان کې د بشري حقونو په اړه د چین او روسیې له نظر پرته نشر شوې ده.
د امریکا د عدلیې وزارت وايي، په کاناډا کې مېشت یو پاکستانی وګړی یې د داعش په ملاتړ په نیویارک کې د برید د پلانولو په تور نیولی دی.
شل کلن محمد شهباز خان په بروکسل کې د یهودانو پر یوه مرکز د اتومات او نیمه اتوماتیک وسلو د برید په پلانولو تورن دی.
رويټرز خبري اژانس ویلي، چې شهباز خان د ۲۰۲۴ کال د اکټوبر په اوومه د حماس له خوا پر اسرائیلو له برید نږدې یو کال وروسته د دغه برید پلان درلود.
یاد اژانس د امریکا د دفاع وزارت له قوله ویلي، چې شهباز خان هڅه کړې وه چې له کاناډا څخه متحده ایالاتو ته سفر وکړي او د برید د ترسره کولو لپاره له خپل پلان کار واخلي.