د طالبانو حکومت وايي، د ټرمپ او ملابرادر د خبرو ریکارډ لري او په مناسب وخت کې به یې نشر کړي.
د ملا عبدالغني برادر د دفتر مشر عبدالله عزام ویلي، د دواړو بشپړې خبرې ریکارډ شوي او فرصت ته په کتو به یې نشر کړي.
عزام ویلي، چې ټرمپ او ملاعبدالغني برادر شاوخوا څلور نیم کاله وړاندې ټیلفوني خبرې کړې وې.
عزام دغه راز زیاته کړې، چې په دې خبرو کې ټرمپ ملا برادر ته اخطار ورکړی وو، چې په امریکايي ځواکونو برید ونه کړي؛ خو ملا برادر بیا ویلي، چې د ټرمپ ټیلفوني اړیکه د ده له لوري ور پرې شوې وه.
د بدخشان د واخان ولسوالۍ اوسېدونکي ګیله کوي، چې له تېرو نږدې دوه نیمو لسیزو راپه دې خوا د دوی په سیمه کې هیڅ پراختیايي پروژې نه دي پلې شوي.
د دې ولسوالۍ اوسېدونکي د روغتیايي مرکزونو د کمښت له کبله د یو شمېر ناورغیو درملنې لپاره له طبي بوټو ګټه پورته کوي؛ خو ډېر نور یې بیا د ناروغیو د مخنیوي له کبله نشهيي توکو څخه ګټه اخلي، چې یو شمېر خلک یې له همدې لارې روږدي شوي دي.
روغتیايي مسوولین هم ستونزې مني او ډاډ ورکوي، چې د خلکو مشکلاتو ته به رسېدنه وکړي.
د یادونې ده، چې واخان د افغانستان یوه لرې پرته ولسوالۍ ده، چې څه موده وړاندې پکې انټرنټي خدمات هم پیل شول.
باوري سرچینې حماسه میډیا ته وایي، چې د طالبانو حکومت شیخ عبدالسمیع غزنوي زنداني کړی دی.
د معلوماتو له مخې، هغه د طالبانو پر حکومت د نیوکو له کبله زنداني شوی دی.
تر اوسه د هغه په اړه په رسمي ډول څه نه دي ویل شوي، خو غزنوي پیاوړی دیني عالم و، چې د طالبانو حکومت ډېر شمېر چارواکي یې شاګردان هم تېر شوي دي.
په همدې حال کې د هغه یو شمېر ملګري وايي، چې مولوي غزنوي حق بیانوو او د طالبانو حکومت کې چې څوک حق وايي، نو ځای یې نه وي.
تر اوسه د هغه په اړه څه معلومات نشته، چې چېرته زنداني دی.
مونږ هڅه وکړه، چې د غزنوي له کورنۍ سره په دې اړه اړیکه ټینګه کړو، خو له هڅو سره سره بریالي نه شو.
د امریکا جمهوري پال وایي، افغانستان سره باید د امریکا مالي مرستې بندې شي.
د یاد ګوند استازي جوش برېچین فاکس نیوز ته ویلي، چې په دې اړه یې طرحه هم چمتو کړې.
دوی اندېښنه لري چې په افغانستان کې دا مرستې د طالبانو لاسته لویږي.
نوموړي ټینګار کړی، چې په دې اړه یو قانون ته اړتیا ده.
یاد ګوند تر دې وړاندې هم په دې اړه اندېښنه ښودلې وه؛ خو طالبان وایي، چې دوی په نړۍوالو مرستو کې کوم کار نه لري.
د ملګرو ملتونو سرمنشي انتونیو ګوتریش له طالبانو وغوښتل چې ژر تر ژره دې د ښځو او نجونو پر وړاندې تبعیضي محدودیتونه لیرې کړي او له شپږم ټولګي د پورته نجونو لپاره ښوونځي او پوهنتونونه دې پرانیزي.
انتونیو ګوتریش ویلي، چې افغان ښځې او نجونې د جنسیت پر بنسټ د تبعیض او ظلم له ژور بحران سره مخ دي.
هغه د طالبانو د امربالمعروف قانون ته په اشارې سره ويلي، دغه قانون له عامه ژوند څخه ښځې او نجونې په سيستماتيک ډول ګوښه کوي.
نوموړي دغه راز ویلي چې افغان ښځې او نجونې تر ډېره په خپلو کورونو کې بندې دي، د تګ راتګ ازادي نه لري او تقریباً تعلیم یا کار ته لاس رسی نه لري.
هغه دغه راز ویلي چې د نجونو زده کړه د اقتصادي پرمختګ او د ټولنې د روغتیا، هوساینې او سوکالۍ د پیل کولو لپاره ترټولو چټکه لاره ده.
د اوکراین ولسمشر ولادمیر زیلنسکي وایي، چې روانه جګړه پای ته رسېدو ته نږدې شوې.
هغه له اې بي سي نیوز سره خبرو کې ویلي، چې دوی په دغه جګړه کې بریالي دي او باید متحدان یې ملاتړ وکړي.
زیلنسکي زیاتوي، دوی له تمې زیات سولې ته نږدې شوي دي.
دا په داسې حال کې ده، چې اوس مهال هم د اوکراین په یو شمېر سیمو کې د روسیې او اوکراین ځواکونو ترمنځ سخته جګړه روانه ده.
د نوبل جایزې ګټونکې ملاله یوسفزۍ وايي، افغانستان کې باید جنسي اپارتاید په رسمیت وپېژندل شي.
نوموړې د کاناډا له لومړي وزیر سره کتنه کې ویلي، چې طالبان باید په دې اړه ځواب ورکړي.
یوسفزۍ په دې لیدنه کې ټینګار کړی، چې د نړۍ مشران باید د افغان نجونو په وضعیت کې ځان ښکېل وګڼي او له دغه حالت څخه د هغوی د راوتلو لپاره ټولې ممکنې هڅې وکړي.
هغې دغه راز ویلي، دا تمه نه لري، چې په دا ډول لیدنو به د افغان نجونو وضعیت ته بدلون ورکړل شي او دا یو واقیعت دی، چې افغان نجونې له سخت وضعیت تېرېږي.
لبنان کې د اسرائیلو د بریدونو له کبله د وژل شویو کسانو شمېر ۵۰۰ ته لوړ شوی دی.
د لبنان د روغتیا وزارت اعلان کړی، چې د دوشنبې په ورځ د اسرائیلو په هوايي بریدونو کې د وژل شویو شمېر ۵۰۰ تنو ته لوړ شو او تر پنځه زره تنو پورې ټپیان لري.
یاد وزارت دا هم ویلي، چې په دغو بریدونو کې د ښځو او ماشومانو په ګډون یو شمېر ډاکټران هم وژل شوي دي.
د یادونې ده، چې د ۲۰۲۳م کال د اکټوبر په اوومه د غزې د جګړې له پیل راهیسې دا لومړی ځل دی چې د لبنان او اسرائیلو په سرحد کې کړکېچ دومره پراخېږي.
د لبنان په جنوب او البقاع ښار کې د اسرائیل وروستیو بریدونو له کبله ۲۷۵ تنه وژل شوي دي.
د لبناني رسنیو د راپورنو له مخې، په دغو بریدونو کې ۱۰۲۴ نور کسان ټپیان دي.
د لبنان روغتیا وزارت وایي، چې په وژل شویو کسانو کې تر ډېره مېرمنې او ماشومان شامل دي.
دا په داسې حال کې ده چې تازه د اسرائیل پوځ د لبنان اوسېدونکو ته خبرداری ورکړی، ترڅو له هغو ځایونو ووځي، چې د حزب الله ډلې وسلې په کې ایښی وي.
د طالبانو حکومت د قطر سیاسي دفتر مشر سهیل شاهین وايي، افغانستان کې دومره امنیت دی، چې اوسني چارواکي په موټرو کې له یو ولایت څخه بل ولایت ته سفر کوي.
هغه پر خپله ایکس پاڼه لیکلي، چې پخواني چارواکي ان په الوتکو کې نشوی تلی؛ خو د اوسني حکومت چارواکي له هرې اندېښنې پرته په موټرو کې سفر کوي.
د شاهین په خبره، دا د دې ښکارندوي کوي، چې د افغانستان خلک له اوسني حکومت څخه راضي دي.