د ملګرو ملتون د ښځو څانګې ویلي، چې افغان نجونې لاهم له پرلپسې ځپنې سره مخ دي.
یاد سازمان لیکلي، چې افغان ښځې له خپلو بنسټيزو حقونو بې برخې شوې، له زده کړو بې برخې شوې، په زوره په کور کې بندیانې شوې او اوس له یو بل سره له اړيکو هم منع کېږي.
دوی ویلي، چې دا بې عدالتي به د نړیوالې ټولنې لپاره یو ګواښ وي.
د امریکا ولسمشریزو ټاکنو کې تر اوسه ټرمپ ۲۳۰ او کاملاهرېس ۲۰۰ الکترال کالج رایې ګټلي دي.
که څه هم تر اوسه د یو شمېر ایالاتونو رایې نه دي شمېرل شوې؛ خو ټرمپ ۴۰ نورو الکترال کالج رایو ته اړتیا لري، چې د بل ځل لپاره ولسمشر شي.
د یادونې ده چې دا پایلې به راتلونکو ساعتونو کې معلومې شي.
د امریکا ولسمشریزو ټاکنو کې ډونالډ ټرمپ بریا ته نږدې شوی.
په دغه ټاکنو کې ډونالډ ټرمپ تر دې مهاله د څه کم ۵۰ ميليونه عامو رايو تر څنګ ۲۱۰ الکټرال رايي ګټلي دي.
بل لورته کاملا هرېس د څه کم ۴۴ ميليونه عامو رايو تر څنګ ۱۱۳ الکټرال رايي ګټلي دي.
د الکټرال ۲۷۰ رايو ترلاسه کولو لپاره ډونالډ ټرمپ ۶۰ الکټرال رايي ته اړتيا لري تر څو د امریکا ولسمشریزې ټاکنې وګټي.
ددغه ټاکنو نهایي پایلې به وروسته اعلانېږي.
د امریکا ولسمشریزو ټاکنو تازه اعلان شوې پایلې ښيي، چې ټرمپ د کالج الکترال ۱۸۸ او کاملاهرېس ۹۹ رایې ګټلې دي.
دا د امریکا د ۱۸ ایالتونو رایې شمېرل کېږي.
دواړه نوماندان د بریالي کېدو لپاره اړتیا لري، چې د الکترال ۲۷۰ رایې واخلي.
که څه هم د یو شمېر ایالتونو رایې نه دي شمېرل شوې؛ خو تر اوسه ټرمپ مخکښ دی.
د اسرائیل د لومړي وزیر له دفتره په خپره شوې خبرپاڼه کې راغلي، چې د اسرائیل د جګړې د مدیریت پر سر د جنجالونو له کبله نتنیاهو د دفاع وزیر یواو ګالانت له دندې لرې کړ.
نتنیاهو ویلي، د هېواد امنیت او یو پرېکنده بری د ده په لومړیتوبونو کې دی.
د هغه په خبره، د هرې جګړې لپاره د لومړي وزیر او دفاع وزیر ترمنځ یو بشپړ باور مهم دی؛ خو ګالانت د ده باور له منځه وړی او هغه لاسته راوړنې یې وبایللې، چې دوی په وروستیو کې ګټلې وې.
د سره صلیب نړیوال فدراسیون ویلي، چې په تېرو درې کالونو کې په افغانستان کې سلګونه ځله زلزلې شوې دي.
د سرچینې د معلوماتو له مخې، افغانستان اوس د زلزلو له کبله د زیانمنو شویو هېوادونو په قطار کې دی، چې په تېرو درې کالو کې په کې ۴۰۰ ځلي زلزلې شوې دي.
یادې ادارې ویلي، افغانستان د اقلیم د بدلون او د طبیعي پېښو د ګواښونو له مخې، څلورم او د اقلیم د تطابق په نړیوال شاخص کې د زیانګالو او چمتووالي له مخې په ۲۴م او ۲۶م ځای کې راغلی دی.
دا په داسې حال کې ده، چې په تېرو دوو کلونو کې په هرات او خوست کې د زورورو زلزلو له کبله سلګونه کسانو ته مرګ ژوبله واوښته.
د پخواني حکومت د ملي روغې جوړې عالي شورا مشر ډاکټر عبدالله عبدالله د سید اسحاق ګیلاني کورته د هغه د ورور د فاتحې لپاره ورغلی دی.
عبدالله عبدالله په خپله ایکسپاڼه لیکلي، چې د سید کاظم ګیلاني د فاتحې مراسم یې پر ځای کړل.
د یادونې ده چې پر عبدالله عبدالله، حامد کرزي او نورو ګڼو افغانستان کې پاتې سیاسونو باندې د سیاسي فعالیتونو او ناستو بندیز لګېدلی دی.
د طالبانو حکومت ویاند ذبیح الله مجاهد وايي، چې په ځینو ولایتونو کې سیمه ییز چارواکي د ملا هبت الله په امر تبدیل شوي دي.
ښاغلي مجاهد په خپله ایکسپاڼه لیکلي، چې د پروان، سرپل، تخار، غور، پکتیکا او ننګرهار ولایتونو اته سیمه ییز چارواکي بدل شوي.
نوموړي ویلي چې د دغه بدلونونو پر بنسټ په پکتیکا کې د طالبانو پخوانی امنیه قوماندان د ننګرهار د پوهنې د رییس په توګه، محمد ادریس انوري د پروان د والي په توګه، محمد ابوالفضل عثماني د پروان د مرستیال والي په توګه، د پروان لپاره د طالبانو پخوانی مرستیال والي قدرت الله امیني د دې ډلې د کورنیو چارو وزارت د امنیتي سلاکار په توګه، د سرپل لپاره د طالبانو پخوانی مرستیال محمد نادر حقجو د والي په توګه، د بامیان ولایت د استخباراتو پخوانی مشر نیک محمد حذیفه په غور ولایت کې د طالبانو د مرستیال والي او محمدالله باور په پکتیکا کې د دې ډلې د امنیه قومندان په په توګه ټاکل شوي دي.
اوکرایني ځواکونو ویلي، چې په کورسک سیمه کې د لومړي ځل لپاره د شمالي کوریا له ځواکونو سره په جګړه کې ښکېل شوي دي.
اوکرایني پوځ تر دې زیات جزیات نه دي ورکړي؛ خو څو ورځې وړاندې د دغه هېواد ولسمشر ولادیمیر زېلېنسکي ویلي وو چې روسیې سره د شمالي کوریا ځواکونه هم یو ځای شول؛ خو لویدیځ دوی سره د مرستو پر ځای تماشه کوي.
د وزیرستان په واڼه سیمه کې د حافظ ګل بهادر ډلې پر پاکستاني پوځیانو برید کړی.
په دغه برید کې درې پاکستاني پوځیان وژل شوي دي.
پاکستاني رسنیو راپور ورکړی، چې دا برید ګل بهادر ډلې اړوند د کمانډر ناصر د ډلګۍ له لوري شوی دی.
د یادونې ده چې حافظ ګل بهادر ډله ډېری وخت پر پاکستاني پوځیانو بریدونه کوي..