سیمهییزې سرچینې وایي، نن سهار وختي د پاکستان له لوري د تورخم دروازه يو ځل بيا د مسافرو په مخ تړل شوې ده.
د معلوماتو له مخې، اوسمهال د دروازې دواړو غاړو ته لسګونه لارۍ او سلګونه مسافر بند پاتې دي.
مسؤلو چارواکو تر اوسه په دې اړه څه نه دي ویلي.
د یادونې وړ ده چې د تورخم دروازه تېره اونۍ هم تړل شوې وه.
اسرائیل د لبنان د جنوب په نبیطه او وادي
الکفور سیمو بمبار کړی.
د لبنان روغتیا وزارت ویلي چې په دغه برید کې شپږ کسان وژل شوي او درې نور ټپیان دي.
بل لورته اسرائیل هم ویلي چې د جمعې په ورځ یې پر حزب الله ډلې بریدونه کړي.
حزب الله ډلې تر اوسه په دې اړه څه نه دي ویلي.
دا په داسې حال کې ده چې د هنیه تر وژل کېدو وروسته حزب الله ډلې پر اسرائیل بریدونه زیات کړي دي.
د کډوالو لپاره د جرمني د حکومت کمېشنر له دې هېواده د هغو افغان کډوالو د ایستلو غوښتنه کړې چې د دوبي رخصتۍ کې افغانستان ته ځي.
یوواخیم سټامپ ویلي، هغه افغان کډوال چې د دوبي رخصتي افغانستان کې تېروي؛ باید جرمني ته بیا پرېنښودل شي.
نوموړي دا څرګندونې د هغه تازه راپور په غبرګون کې کړي چې وايي، په جرمني کې دېری زرګونه افغان پناه غوښتونکي د دوبي رخصتۍ په افغانستان کې تېروي.
سټامپ ټینګار کوي چې جرمني باید د کډوالو نړۍوال قانون ته ژمن وي.
د ازبکستان لومړی وزیر عبدالله عاروف کابل ته راغلی.
په سپیدار ماڼۍ کې یوه سرچینې حماسه میډیا ته ویلي دي، چې د ازبکستان لومړی وزیر عبدالله عاروف نن سهار پلازمینې ته کابل ته راورسید.
ټاکل شوې ده، چې نوموړی به د طالبانو حکومت د رئیس الوزراء د سیاسي مرستیال مولوي عبدالکبیر، بهرنیو چارو وزیر او نور طالب چارواکو سره پر دوه اړخیزو موضوعاتو خبرې وکړي.
د متحده عربي امارتو د دولت رئیس وایي، دوی له افغانستان سره د یو ورور هېواد په څېر مرسته کوي.
د طالبانو حکومت ویاند ذبیح الله مجاهد پر خپله ایکس پاڼه لیکلي، چې محمد بن زاید ال نهیان له رئیس الوزرا سره لیدنه کې د دواړو هېوادونو د نږدېوالي هیله څرګنده کړې.
مجاهد زیاته کړې، چې رییس الوزرا ملا محمد حسن اخند د متحده عربي اماراتو له ولسمشر مننه کړې او له افغانانو سره یې د یاد هېواد له بشري مرستو او پراختیایي پروژو هرکلی کړی دی.
د یادونې ده چې د طالبانو حکومت رئیس الوزرا د درملنې لپاره متحده عربي اماراتو ته تللی دی.
د افغانستان د ژغورنې لپاره د مقاومت د عالي شورا غړی او د پوهنتون استاد حبیب الرحمن سیاف د اګسټ د ۱۵مې په اړه وایي، افغانستان د یو پلان له مخې ترهګرو ته وسپارل شو.
ښاغلي سیاف نیوکه وکړه چې په افغانستان د افراطي ډلې حاکمیت ښځې له خپلو حقوقو او نارینه له خپل اختیاره بې برخې کړي دي.
حبیب الرحمن سیاف چې د افغانستان د ژغورنې لپاره د مقاومت د عالي شورا له نورو غړو سره په یوه انلاین غونډه کې خبرې کولې، ویلي چې اسلامي حکومت ولس ځانته را نږدې کوي، نه دا چې ظلم او د تورو تیارو خواته یې وړي.
نوموړي زیاته کړې چې په مونږ فرض ده چې د افغانستان مظلوم ولس د بنده ګانو له بنده ګۍ وژغورو.
هغه ویلي، چې ټول افغانان د مشارکت حق لري؛ خو نن چې کوم ظالم حکومت په افغانستان کې واکمن شوی نه پوهېږو چې له کوم دولت او کوم میکانیزم له مخې تعین شوی.
سیاف همدا راز ویلي چې که اسلامي تاریخ مطالعه کړو، څلور خلیفه ګان هم د مسلمانانو د رایو له مخې تعین شوي دي؛ خو طالبانو دا ټول حقوق په بدماشۍ تر پښو لاندې کړي.
د هغه په خبره، نن د افغانستان بې وزله وګړي په یو سفارت او بل سفارت سرګردانه ګرځي، چې ځان ته یو امن ځای ومومي.
هغه همدا راز له طالبانو غوښتي، چې خلکو ته حق ورکړئ او د خلکو غوښتنو ته اولیت ورکړئ تر څو ښه راتلونکی ولرو.
ډیلي شهادت ورځپاڼه وایي، چې د حزب اسلامي مشر ګلبدین حکمتيار په تېرو درې میاشتو کې شل بېلابېل کتابونه لیکلي.
دغې ورځپاڼې لیکلي، چې حکمتیار دا کتابونه په مختلفو عنوانونو کې لیکلي دي.
یادې ورځپاڼې زیاته کړې، چې ډېر ژر به ټولو داخلمېشتو او بهرمېشتو هېوادوالو ته د یادو کتابونو د چاپ خبر ورکړي.
دې ورځپاڼې همدا راز لیکلي، هغه هېوادوال چې په بهر کې اوسي، هغوی ته به په سافټ بڼه کتابونه ور ورسېږي.
د ټولنیزو رسنیو یو شمېر افغان کاروونکي وايي، بهرني هېوادونه ورسره هغه تحصیلي اسناد نه مني چې د طالبانو د بهرنیو چارو وزارت له لوري تصدیق شوي وي.
دوی وايي، اوس مهال ګڼ شمېر هغه خلک چې غواړي بهر کې لوړې زدکړې وکړي، له دې ستونزې سره مخ دي.
یادو کسانو غوښتنه کړې چې دا موضوع باید په جدي ډول وڅېړل شي.
د طالبانو حکومت تر اوسه په دې اړه څه نه دي ویلي؛ خو دوی وايي چې د بهرنیو چارو وزارت له لوري یې د تحصیلي اسنادو تصدیق په عادي ډول روان دی.
د ازادو سیالیو افغان لوبغاړی عبدالکریم بدخشي نن شپه له خپل تاجکستاني سیال ایتالله مومنوف سره سیالي کوي.
عبدالکریم ۲۶ کاله او سیال یې ۲۳ کاله عمر لري، چې تر اوسه یې دولس سیالۍ ګټلې او څلور نور یې بایللې دي.
دا سیالۍ د “اې سي اې” سازمان په کوربهتوب په مسکو کې ترسره کېږي.
خیبر پښتونخوا کې د امپوکس ناروغۍ درې نوې پېښې ثبت شوې دي.
د خیبر پښتونخوا چارواکو ویلي، چې دا کسان څه موده وړاندې له متحده عربي اماراتو څخه راستانه شوي وو.
تر دې وړاندې پاکستان کې یوه ښځه پر دغې ناروغۍ اخته شوې وه.
دا یوه خطرناکه ناروغي ده چې اوس د روغتیا نړۍوال سازمان د نړۍ په کچه د دغې ناروغۍ له کبله د بېړنی روغتیايي وضعیت اعلان کړی دی.
د دغه سازمان مسوولینو د یادې ناروغۍ لپاره د واکسین د جوړونې په موخه د یوه کاري پروګرام له جوړولو هم خبر ورکړی دی.
دوی زیاتوي، د روغتیا نړۍوال سازمان د یادې ناروغۍ د راکابو کولو لپاره د واکسین د تولید لپاره د واکسینونو له تولیدي شرکتونو سره اړیکې ټینګې کړې دي.