حماس ډلې په غزه کې د اوربند او د یرغمل شویو کسانو د خلاصون په اړه د واشنګټن نوی وړاندیز رد کړ.

حماس ډلې د اسراییلو لومړی وزیر بنیامین نتنیاهو هم د “جګړې په اوږدولو” تورن کړ.

دغې ډلې د یکشنبې په ورځ په یوه بیان کې اعلان وکړ، چې په دوحه کې د خبرو په وروستي پړاو کې د منځګړیتوب له خبرتیا وروسته، موږ یو ځل بیا دې نتیجې ته ورسېدو چې نتنیاهو لا هم یوې هوکړې ته د رسېدو په لاره کې خنډونه جوړوي.

دا بیان په داسې حال کې خپور شوی چې د امریکا د بهرنیو چارو وزیر د واشنګټن د منځګړیتوب د هڅو د یوې برخې په توګه تل ابیب ته سفر کړی دی.

د بایډن اداره هڅه کوي چې د اسراییلو او حماس ترمنځ د سرحدونو د کنټرول، د اسراییلي یرغمل شویو او امنیتي بندیانو د شمیر او هویت او د غزې د راتلونکي مدیریت په اړه واټن کم کړي.

د متحده ایالاتو ولسمشر جو بایډن د جمعې په ورځ وویل چې دواړه خواوې یوې هوکړې ته تر بل هر وخت نږدې دي.

د پخواني حکومت د ملي امنیت پخوانی رییس رحمت الله نبیل وایي، چې نن د اسد ۲۸مه باید په یاد ولرو چې دا ازادي د زړورتیا او قربانیو په بیه ترلاسه شوې ده.

رحمت الله نبیل په خپله ایکس‌پاڼه لیکلي، چې شاه امان‌الله خان نه یوازې د خپلواکۍ بیرغ پورته کړ، بلکې د تعلیم او پرمختګ څراغ یې هم روښانه کړ.

نوموړي زیاته کړې چې غازي امان الله خان پوهېده چې د ښځو او نارینه وو زده‌کړه د ټولنې د حقیقي ازادۍ او پرمختګ بنسټ دی.

نبیل همدا راز ویلي، چې له بده مرغه نن، طالبانو د علم ډیوه مړه کړې او ښځې یې له زده‌کړو محرومې کړې او هېواد یې د تور جهالت او اسارت په تروږمۍ کې روان کړی دی.

ښاغلي نبیل دغه راز ویلي چې زموږ مسوولیت دی چې د امان‌الله خان په لاس روښانه شوې د تعلیم او پرمختګ ډیوه بله وساتو او ځانونه حقیقي ازادۍ ته ورسوو.

د نوموړي په خبره، ازادي ساتنې او پالنې ته اړتیا لري او یوازې د علم، یووالي او اتحاد په مرسته موږ کولی شو د آزادۍ د لارې د قربانیانو د هیلو ډیوې بلې وساتو او د افغانستان لپاره یو روښانه راتلونکې چې د پرمختګ او ټولنیز عدالت پر بنسټ ولاړه وي، جوړه کړو.

د افغانستان د ژغورنې لپاره د ملي مقاومت په نوم شورا لیکلي، چې اوسنی وضعیت افغانستان نور هم سیاسي انزوا لور ته وړي.

دوی ویلي، پر افغانستان د خپلواکۍ کالیزه داسې مهال را رسیږي، چې دمګړی ټول هېواد اشغال دی.

اعلامیه کې راغلي، افغانستان کې هیڅ ډول ازادي شتون نه لري او دا هېواد ورو ورو د تروریزم پر ځالې بدلېدونکی دی.

د پخواني حکومت د بهرنیو چارو وزیر حنیف اتمر د خپلواکۍ د ورځې په پار مبارکي ویلې.

اتمر ویلي، د هېواد د نظام او برخلیک په ټاکلو مې د خلکو د حاکمیت لپاره مبارزې ته دوام ورکول تر ټولو مهم مسؤلیت دی، چې اوسنیو ځوانانو ته سپارل شوی.

هغه هیله څرګنده کړې چې ځوانان دغه مسؤلیت په درست ډول ادا کړي.

د یادونې ده چې نن د اسد ۲۸مه د انګریز ښکېلاک څخه د هېواد د خپلواکۍ ۱۰۵مه کلیزه ده.

د طالبانو حکومت لوړ پوړی غړی انس حقاني وایي، په حاکمیت کې باید د قدرت تر شا تر قدرته ستر ارمان ولاړ وي.

هغه د خپلواکۍ د ۱۰۵مې کالیزې په مناسبت لیکلي چې، “د امیردوست محمد خان د زامنو تر منځ د قدرت پر سر شخړې، د امیرشېرعلي خان ناسمو محاسبو او کورنیو لانجو او د امیر عبدالرحمن خان د قدرت تندې په ۱۸۷۹ کې راڅخه په بهرني سیاست کې خپلواکي او نور مهم څه واخېستل، داسې چې د تاریخ د دې زخمونو خولې لا راټولې نه دي.”

د یادونې ده چې نن د خپلواکۍ ۱۰۵مه کالیزه د طالبانو حکومت له لوري هم په دفاع وزارت کې ونمانځل شوه.

د امریکا پخوانی ولسمشر ډونالډ ټرمپ وایي، کاملا هرېس ته ماتې ورکول تر بایډن ډېر اسانه دي.

هغه پنسلوانیا کې یوې غونډې ته ویلي چې په ډېرې لېوالتیا سره له هرېس سره مناظرې ته په تمه دی.

تر دې وړاندې هرېس ویلي وو چې تر ولسمشرې کېدو وروسته به د توکو بیې راټیټې کړي.

بل لورته ځینو ټولپوښتنو ښودلې چې د هرېس تر نوماندېدو وروسته؛ د پخوا په پرتله د بایډن پلویان کم شوي دي.

د طالبانو حکومت د طبيعي پېښو پر وړاندې د مبارزې ادارې عمومي مشر نورالدين ترابي ویلي، له هغو خلکو سره به مالي مرسته وکړي چې د هرات ګمرک اورلګېدنې پېښه کې ورته زیان رسېدلی .

ترابي هرات ته په خپل سفر کې له قربانیانو سره ژمنه کړې چې د هرات ګمرک د اورلګېدنې په تړاو به هر اړخیزې څېړنې وکړي.

د هغه په ​​وينا، د اورلګېدنې د لامل له څېړنې او د اوښتي مالي زيان له معلومولو وروسته به طالبان هڅه وکړي څو د پېښې قربانيانو ته مالي مرستې وړاندې کړي.

لاهم د یادې اورلګېدنې د علت او اوښتو زیانونو په اړه معلومات نشته.

د طالبانو حکومت د خپلواکۍ د ۱۰۵مې کالیزې په مناسبت افغانانو ته مبارکي ورکړې.

دوی یوې خبرپاڼه کې ویلي، چې افغانان سل کاله وروسته هم د ازادي ګټلو روحیه لري.

په همدې اړه جوړو شویو مراسمو کې د طالبانو حکومت د دفاع سرپرست مولوي یعقوب مجاهد ویلي، چې مسؤلین باید له تعصب لاس واخلي او خلک یووالي ته وهڅوي.

هغه زیاته کړې چې موږ د هیچا فرمایش نه منو، موږ یوازې د خپلو امیرانو اطاعت کوو.

نوموړي په خلکو غږ کړی چې دوښمنانو ته په غر او هواره کې ځای مه ورکوئ.

یو شمېر راپورونه وايي چې د طالبانو حکومت د کورنیو چارو وزارت د « هارټ او اي ډي جي» امنتیي کمپونو څخه د جمهوریت د وخت ګاردان منفکوي.

د طالبانو د کورنیو چارو وزارت اړوند د کشف او جرايمو سره د مبارزې رياست د رييس ملا عزيز الله محمود، د ډاياک مدیریت لوی مدير بشير احمد منير او د هغه همکار مدير قاري سميع الله د تېرو پنځو مياشتو راهيسي د سلګونو هغو کسانو ليستونه چمتو کړي چې په تېر جمهوريت کې يې دندې تر سره کړې وې او اوس دلته پر دندو بوخت وو.

که څه هم واک ته د طالبانو حکومت تر رسېدو وروسته؛ د پخواني حکومت ګڼ شمېر کار کوونکي منفک شوي؛ خو ویل کېږي چې دغه دفتر هره اوونۍ له لسو تر پنځلسو هغه کسان له دندو منفک کوي چې په تېر حکومت کې یې دندې کولې.

حماس ډلې غزه کې د اوربند لپاره نوي شرطونه رد کړي دي.

په غزې کې د اوربند لپاره په راغلو شرطونو کې یو یې دا و چې مصر سره نږدې به د غزې پر پوله د اسرائیل پوځیان ځای پر ځای کړي.

حماس دغه راز له هغه شرط سره هم مخالفت ښودلی، چې دوی به د اسرائیل یرغمل شوي کسان د فلسطیني بندیانو په بدل کې خوشې کوي.

بل لورته نتنیاهو غزه کې د اوربند په اړه له منځګړو هېوادونو غوښتي چې حماس د هغه چوکاټ منلو ته وهڅوي چې بایډن جوړ کړی.

د یادونې ده چې غزه کې د اوربند لپاره خبرې پیل شوې، چې منځګړي هېوادونه یې وایي چې دواړه لوری یې اوربند ته نږدې شوي دي.