پاکستان کې د افغانستان وروستی سفیر نجیب الله علي خیل د پاکستان او طالبانو ترمنځ ستونزې ریښتینې وبللې.
نوموړی وایي، اوس مهال د پاکستان او طالبانو اختلافات ژورو ته رسېدلي دي.
هغه وایي، پاکستان اوس په اقتصادي، سیاسي او امنیتي کړکېچ کې قرار لري او ښایي د ټي ټي پي او بلوڅو خوځښتونه به مهار نه کړای شي.
پاکستان کې د افغانستان وروستی سفیر نجیب الله علي خیل وایي، جمهوري نظام تدریجي سقوط وکړ او د جمهوریت یو شمېر چارواکو افغانستان کې له د پاکستان له سفارت سره اړیکې درلودې.
علي خیل حماسه میډیا سره خبرو کې وایي، افغان حکومت به خبر هم نه وو؛خو چارواکي به اسلام اباد ته رسېدلي وو.
هغه وایي، پاکستان کې یو شمېر مشخصو خلکو هغه کسان تعقیبول چې افغان سفارت ته به یې تګ راتګ کوو.
نوموړی زیاتوي پر دغو کسانو به په یو نه یو ډول فشار راوړل کېده.
د علي خیل په خبره، یاد کسان استخباراتي وو چې په شخصي جامو کې به ناست وو.
پاکستان کې د افغانستان وروستی سفیر نجیب الله علي خیل وایي، پاکستان یو مستقل او پر ځان بسیا افغانستان نه غواړي.
نوموړی وایي، پاکستان غواړي چې افغانستان تل دوی ته محتاج وي.
د علي خیل په خبره، پاکستان غواړي افغانستان کې تر خپل واک لاندې حکومت جوړ کړي.
د ده په خبره، د ده په ماموریت کې به یو شمېر چارواکو پاکستان ته سفرونه کول؛ خو کله به یې چې بهرنیو چارو وزارت نه پوښتنه وکړه؛ نو هغوی به هم خبر نه وو.
عليخیل زیاتوي، ګلبدین حکمتیار، احمد ولي مسعود او کریم خلیلي به په جي ایچ کیو کې له پاکستاني چارواکو سره پټې لیدنې کولې؛ خو زه به یې هیڅ نه جریان کې کولم.
پاکستان کې د افغانستان وروستی سفیر نجیب الله عليخیل وایي، له هند سره د طالبانو اړیکې له کنټرول وتلي، چې دا چاره د پاکستان لپاره د منلو نه ده.
نوموړي حماسه میډیا سره خبرو کې ویلي، د طالبانو او پاکستان ترمنځ اړیکې خورا خرابې شوې او بندیزونه یې هم یو پر بل لکولي.
پاکستان کې د افغانستان وروستی سفیر نجیب الله علي خیل وایي، کله چې امریکا د ۲۰۲۰ کال اکتوبر میاشت کې د ختیځ ترکستان ډله د ترهګرو ډلو له لیسته ووېسته؛ نو دې چارې د چین امنیتي اندېښنې را وپارولې.
نوموړي له حماسه میډیا سره په خبرو کې ویلي، چې چین په دې اړه اندېښمن دی، چې دا چاره به د واخان له لارې د دغه هېواد تر سینګانګ ایالت ور ورسیږي.
دا په داسې حال کې ده چې د طالبانو حکومت وایي، واخان خوندي دی او اوس مهال هلته د دوی سرتېري مېشت دي.
که څه هم د حماس او اسرائیل ترمنځ په اوربند هوکړه شوې؛ خو د اسرائیل لومړی وزیر وایي، تر هغې به اوربند ته دوام ورنکړي تر څو ورسره حماس ډله د هغو ۳۳ بندیانو نوملړ شریک نه کړي چې را خوشې کېږي.
بنیامین نتنیاهو ویلي، اول باید په دې برخه کې ډاډ تر لاسه شي.
سره له دې چې د پنجشنبې شپه پر اوربند هوکړه وشوه، خو بیا هم اسرائیلو د غزې یو شمېر سیمې بمبار کړي.
له شاوخوا لس ورځو وروسته، د طالبانو حکومت د ریاست الوزراء پخواني سیاسي مرستیال مولوي کبیر د کډوالو چارو وزارت د سرپرست په توګه دنده پیل کړه.
د یاد وزارت د خبرپاڼې له مخې، مولوي کبیر نن رسما خپله کاري ورځ پیل کړه.
تر دې وړاندې داسې راپورونه خپاره شوي وو چې ګواکې مولوي کبیر د طالبانو حکومت د مشر شیخ هبتالله اخوندزاده پرېکړه نه مني او پر نوې دندې راضي نه دی.
د طالبانو حکومت د بهرنیو چارو وزارت سیاسي مرستیال شېر محمد عباس ستانکزي ویلي، عصري زده کړې هم د دیني زده کړو په څېر مهمې دي او باید په دې برخه کې ټولې اسانتیاوې برابرې شي.
هغه ویلي، د پخوانیو نظامونو د ړنګېدو یو دلیل د مدرسې او ښوونځي ترمنځ واټن راوستل وو او اوس باید دا واټن ختم شي.
نوموړي تر دې وړاندې هم د زده کړو په برخه کې د طالبانو حکومت پر پالیسیو توندې نیوکې کړې؛ خو تر اوسه یې خبرو ته کوم ارزښت نه دی ورکړل شوی.
هلمند کې د یوې جهادي مدرسې زده کوونکي ځان وژنه کړې.
دا مدرسه د هلمند په لښکرګاه ښار کې موقیعت لري.
تر اوسه د پېښې انګېزه نه ده روښانه شوې.
د یادونې ده چې تر دې وړاندې په مدرسو کې له زده کوونکو سره زیات تاوتریخوالی شوی.
د تېر جمهوري حکومت لومړی مرستیال امرالله صالح وایي، د جمهوریت پر وړاندې دسیسه د جمهوریت وروستیو کې جوړه نه شوه؛ بلکې دا دسیسه څه باندې یوه لسیزه وړاندې جوړه شوې وه.
ښاغلي صالح پر خپله ایکسپاڼه لیکلي، ۲۰۱۳ کال دوحې ته دعوت شوی و او هلته کوربه هېواد ورته ویلي وو چې له طالبانو سره وګوري.
نوموړی زیاتوي، ده د کوربه هېواد دا غوښتنه په کلکه رد کړه او وروسته یې هملته د وخت ولسمشر حامد کرزی هم وپوهوو، چې د دغه پلان پر وړاندې ودریږي.
د صالح په خبره، که څه هم کرزي د طالبانو د دوحې دفتر په اړه غبرګون وښود؛ خو کومه پایله یې ورنه کړه.
نوموړی وایي، د یو سم پلان پر اساس د جمهوریت د نړېدو دا پلان شنډېدلای شو؛ خو د جمهوریت له لوري ورته منظم پلان ونه نیول شو.