نا معلومو وسله والو دایکندي کې دوه تنه وژلي دي.
سیمهییزې سرچینې وایي، وژل شویو کسانو کې یوه مېرمن هم شامله ده.
یاده پېښه په شیکاراباد ولسوالي کې رامنځته شوې ده.
ویل کېږي چې وژل شویو کسانو کې یوه مور او د هغې ۲۲ کلن زوی وژل شوی دی.
تر اوسه ددغې پېښې مسولیت کوم چا نه دی منلی.
د امریکا ولسمشر جوبایډن د اسرائیل له لومړي وزیر بنیامین نتنیاهو سره ټیلفوني خبرې کړې دي.
د سپینې ماڼۍ د معلوماتو له مخې، دواړو لوریو په دې خبرو کې پر اسرائیل د ایران احتمالي برید د دفاع په اړه بحث کړی.
بایډن ویلي، امریکا پر اسرائیل د ایران د نیابتي ډلو د بریدونو دفاع ته چمتو ده.
بایډن غزه کې پر اوربند او د اسرائیلي بندیانو پر خلاصون هم ټینکار کړی.
د یادونې ده چې ایران کې د اسماعیل هنیه له وژل کېدو وروسته ایران په وار وار وویل چې د هنیه غچ به له اسرائیل واخلي؛ خو تر اوسه یې هېڅ اقدام نه دی کړی.
د تېر جمهوري حکومت د چارو ادارې لوی رییس فضل محمود فضلي وایي، چې د افغانستان لپاره د بشري حقونو په برخه کې د ملګرو ملتونو سازمان د ځانګړي راپور ورکوونکي ريچارډ بنټ دنده، په غزه کې د دغه سازمان د بشري هلو ځلو سره ډېر ورته والی لري.
فضلي ویلي، چې په غزه کې هره ورځ د سلګونو بې ګناه وګړو د وژل کېدو تر څنګ د هوا له لارې د بشردوستانه مرستو په نوم د خوراکي موادو کڅوړې غورځول کېږي.
فضلي زیاته کړې، چې دا ډول رياکارانه هڅې يوازې روانه فاجعه تر سیورې لاندې نيسي، خو د فاجعې دريدو سره مرسته نکوي.
فضلي دغه راز وایي چې له بده مرغه په افغانستان کې د ملګروملتونو سياسي برخه د موجوده افراطي او استبدادي حاکمیت د عادي کولو پروژه پرمخ بیایي.
فضلي ددغې ادارې د بشري حقونو د ځانګړي راپور ورکونکي دفتر، په اصل کې پر انساني ارزښتونو ژمنو افغانانو ته د فریب لپاره نمایشي فعالیت کوي.
فضلي وایي چې زموږ اصلي ستونزه د غیرمشروع حاکمیت او استبداد عادي کول دي، نه د نمایشي ګزارشونو نشتوالی.
نوموړی زیاتوي چې ازاد خبریالان او محققین بايد په افغانستان کې د ملګرو ملتونو سازمان فعالیتونه؛ په ځانګړې توګه د سیاسي څانګې کاري موخې په ژوره توګه وڅیړي او پايلې يې خلکو سره شريکې کړي.
افغانستان لپاره د ملګرو ځانګړي راپور ورکوونکي ریچارډ بېنېټ له طالبانو غوښتي، چې له خپلې پرېکړې لاس واخلي.
هغه ویلي، افغانستان ته باید د سفر اجازه ورکړل شي.
د بېنېټ په خبره، افغانستان ته پر نوموړي د سفر بندیز نړۍوالې ټولنې سره د طالبانو حکومت د تعامل په برخه کې اندېښنې راپورته کوي.
هغه زیاتوي، تېر یوه کال کې یې افغانستان ته سفر نه دی کړی او زیاتوي چې تر دې وروسته به هم خپلې دندې ته دوام ورکړي.
دا په داسې حال کې ده چې تېره ورځ د طالبانو حکومت ویاند ذبیح الله مجاهد ویلي چې ریچارد بېنېټ د دوی پر ضد تبلیغات کول او په وینا یې باور پرې نه شي کولی.
هغه زياته کړې چې ریچارډ بېنېټ کوچنۍ موضوع ستروله او نورو سازمانونو ته یې ناسم معلومات ورکول.
ریچارډ بېنېټ په خپلو رپوټونو کې افغانستان کې د بشري حقونو او په تېره د نجونو او مېرمنو د حقونو د وضعیت د خرابېدو په اړه ملګرو ملتونو ته معلومات وړاندې کول.
د المان هېواد هغه دوه افغانان د سویډن پارلمان سره نږدې په ډزو تورن کړل، چې تېر کال یې نیولي وو.
ویل کېږي، چې یاد کسان یو یې داعش او بل یې د دغې ډلې ملاتړی و.
د المان لویې څارنوالۍ ویلي، چې یاد کسان رامین او ابراهیم نومیږي او دا کار یې د یو سویډني له لوري د قرانکریم د سوځېدو غبرګون کې کړی دی.
څارنوالۍ دغه راز ویلي، چې دوی داعش ډلې سره مالي مرستې هم کولې.
د پخواني حکومت د بهرنیو چارو وزیر حنیف اتمر افغانستان ته د ریچارډ بینټ سفر ته د بندیز په غبرګون کې ویلي، چې دا چاره د افغانستان بحران نور هم ژوروي.
هغه د طالبانو دا اقدام غیر مسؤلانه بللی.
د اتمر په خبره، دا چاره به د دوحې خبرې اترې، د افغانستان او نړۍ اړیکې او له نړۍ سره د طالبانو تعامل کمرنګه کړي.
هغه له طالبانو غوښتي چې ژر تر ژره دا پرېکړه بېرته واخلي.
دا په داسې حال کې ده چې تېره ورځ د طالبانو حکومت ویاند ذبیح الله مجاهد ویلي چې د ملګرو ملتونو د بشري حقونو د شورا ځانګړی راپور ورکوونکی، ریچارد بېنېټ د دوی پر ضد تبلیغات کول او په وینا یې باور پرې نه شي کولی.
هغه زياته کړې چې ریچارډ بېنېټ کوچنۍ موضوع ستروله او نورو سازمانونو ته یې ناسم معلومات ورکول.
ریچارډ بېنېټ په خپلو رپوټونو کې افغانستان کې د بشري حقونو او په تېره د نجونو او مېرمنو د حقونو د وضعیت د خرابېدو په اړه ملګرو ملتونو ته معلومات وړاندې کول.
قزاقستان هېواد د طالبانو حکومت له لوري ور پېژندل شوی کس محمد رحمان رحماني په استانه کې د افغانستان سفارت د شارژادفیر په توګه ومانه.
د یاد هېواد د بهرنیو چارو وزارت مرستیال له رحماني سره لیدلي او د هغه د دندې تائید یې کړی دی.
علي بیک بایکاف ویلي، چې له دې کار یې موخه له افغانستان سره د سیاسي او سوداګریزو اړیکو پراختیا ده.
هغه ویلي، له افغانستان سره د اړیکو پراختیا د سیمې ثبات تامینوي.
د یادونې ده چې تېره ورځ متحده عربي اماراتو هم بدرالدین حقاني په دغه هېواد کې د سفیر په توګه منلی وو.
فارس خبري اژانس خبر ورکړی، چې د ابراهیم رئیسي د الوتکې نسکورېدو پېښې په اړه وروستۍ پلټنې شوې دي.
د معلوماتو له مخې، د رئیسي پرواز باید تر یوې بجې وړاندې شوی وی؛ خو دا پرواز په ځنډ شوی.
دغه راز د وزن له پلوه هم په دغه الوتکه کې دوه کسان زیات ناست و،.چې لوړ الوت یې نشو کولای.
د یادونې ده چې د رئیسي الوتکه د روان کال په می میاشت کې د ایران په شمال لویدیځ کې لوېدلې وه چې د یو پیلوټ او د ایران د بهرنیو چارو د وزیر امیر عبداللهیان هم پکې خپل ژوند له لاسه ورکړ.
د طالبانو حکومت د عدلیې وزارت اعلان کړی، چې د طالبانو مشر ملاهبت الله د امربالمعروف وزارت قانون توشیح کړ.
دا قانون یوې مقدمې، څلور فصلونو او ۳۵ مادو کې په رسمي جریده کې چاپ شوی.
راپور کې راغلي چې امربالمعروف مکلف دی، ترڅو د پردیو نارینهوو او ښځو ترمنځ اړیکې ختمې کړي.
دغه راز بیا یاد وزارت مکلف شوی، چې رسنۍ، دولتي کارکوونکو او عام خلک اسلامي شعایرو احترام ته راوبولي.
دغه قانون کې د حجاب پرته او نامحرومو سړیو سره د ښځو ګډ تګ او سفر هم منع شوی دی.
د قانون له مخې، که هر چا د امر بالمعروف د محتسبینو امر ونه مانه؛ نو له یو ساعت څخه به تر درې ورځو پورې د بند سزا ورکول کېږي.
خلیج ټایمز راپور ورکړی، چې متحده عربي اماراتو د ټولنیزو رسنیو په یو شمېر سرغړونو ۵۰۰زره درهمه جریمه او پنځه کاله محبس تېرولو سزا اعلان کړه.
دغه سرغړونو کې د اماراتو د آمیر یا حکومتي مشرانو سپکاوی، په حکومتي چارو نیوکه، د هېواد اقتصاد ته زیان رسول، د ټولنې اخلال، ماشومانو ته زیان رسول، د دولتي غونډو جزیات خپرول، جعلي معلومات خپرول منع اعلان شوي.
متحده عربي اماراتو دا اصول د ټولنیزو رسنیو د محتوا کنټرول لپاره وضع کړي دي.