د تېر جمهوري حکومت د ملي امنیت پخوانی رئیس رحمت الله نبیل وایي چې طالبانو د دین او زور څخه په ناوړه ګټه اخیستلو سره، په افغانستان کې یو ظالم او فاسد رژیم تحمیل کړی دی او د اسلامي تعلیماتو څخه یې د خپلې واکمنۍ د ټینګښت لپاره وسیله جوړه کړې ده.
نبیل په خپله اېکسپاڼه لیکلي چې دا شومه اړیکه چې د دین، دربار او استبداد تر منځ جوړه شوې، نه یوازې اسلام تحریف کړی، بلکې د خلکو ایمان یې هم کمزوری کړی دی.
هغه ویلي:”رښتینو عالمانو؛ اوس ستاسو تاریخي دنده ده چې دا دوکه او چل افشا کړئ.”
نوموړي زیاته کړې چې په ولسواکو نظامونو کې، د څو ناوړه چارواکو فساد او د واک څخه ناوړه ګټه اخیستنه په کلکه غندل کېږي او خلک یې په وړاندې غبرګون ښيي؛ خو نن، طالبان د دین په نامه پراخ فساد خپروي او بنسټیز کوي.
هغه همدا راز پوښتنه کړې: “آیا وخت نه دی رارسېدلی چې تاسې، رښتینی عالمان، پوښتنه وکړئ: دا فساد د څه شی نتیجه ده؟ آیا دا د هغو کسانو د ناسم عملونو پایله ده چې د دین په نوم حکومت کوي، که په تفسیرونو او برداشتونو کې باید بیا کتنه وشي؟”
نبیل دغه راز دیني عالمانو باندې غږ کړی چې دا ستاسو مسؤلیت دی چې دین اسلام د دغو ناوړه ګټه اخیستونکو څخه وژغورئ.
د هغه په وینا، طالبان به ژر یا وروسته له منځه ولاړ شي، خو که تاسو په دې لار کې چوپ پاتې شئ، کېدای شي دین ته داسې زیان ورسوي چې جبران یې ناشونی وي.
د نوموړي په خبره، که نن تاسو، رښتینو عالمانو، په دې فساد او انحراف باندې چوپتیا غوره کړئ، سبا به تاسو نور حق ونه لرئ چې څوک د دین دښمنۍ په نوم ملامت او سپکاوی یې کړئ.
