ټاکل شوې چې د افغانستان او نیوزیلنډ ترمنځ یوازینۍ ټسټ سیالۍ سبا په هند کې پیل شي.

دا سیالۍ په هند کې د افغانستان په کوربه توب پیلږي، چې وار له مخه د دواړو هېواودنو لوبډلې ور رسېدلې دي.

تر دې لوبې وړندې د نیوزیلنډ لوبغاړو دغه لوبه مهمه بللې او د بشپړ چمتووالي خبر یې ورکړی دی.
دا لومړی ځل دی چې افغان لوبډله له نیوزیلنډ سره ټسټ سیالۍ کوي.

دا سیالي په داسې مهال ترسره کېږي، چې په تېر نړیوال جام کې افغان لوبډلې نیوزیلنډ ته په ستر توپیر ماتې ورکړې وه.

باید یاده شي چې په دغه سیالۍ کې افغان ورو توپ اچونکی راشد خان او رحمان الله ګربز نه لوبیږي.

اور اسیا په یو تحلیلي راپور کې ویلي، چې د طالبانو مشر ملا هبت‌الله د خپل قدرت ساتلو لپاره په تېرو درې کالو کې د طالبانو لیکو کې خپل کسان د پام وړ زیات کړي دي.

د راپور پر بنسټ، نوموړی د کندهار له دفتر د طالبانو سیاست پلی کوي.

راپور زیاتوی، چې نوموړي د سراج الدین حقاني او د ملا یعقوب د نفوذ مخنیوي لپاره هم ځانګړي کسان ټاکلي دي.

دا په داسې حال کې ده چې څه موده وړاندې کندهار کې نوموړي طالب مسوولینو ته د بشپړې پیروۍ امر کړی وو.

ډاکټر عبدالله عبدالله وایي، احمدشاه مسعود له تعصبه پاکه څهره وه، چې د افغانستان تاریخ کې یې نوم په ښه ډول یادیږي.

د عبدالله په خبره، مسعود د افغانستان قومي او مذهبي تنوع څخه ژوره پوهه درلوده او تل یې هڅه کوله چې د افغانستان خلک ملي او ولسي ګټو په محور کې راټول کړي.

د یادونې ده چې نن د سنبلې اتلسمه د احمدشاه مسعود له ۲۳م تلین سره برابره ده چې پخوا دا ورځ د شهید اوونۍ په توګه کابل او یو شمېر ولایتونو کې په جمع‌او جوش نمانځل کېده.

د طالبانو حکومت لابیګر او د کابل د امنیه قومنداني پخواني ویاند جنرال مبین یو وار بیا د طالب چارواکو له چلند شکایت کړی.

هغه ویلي، چې د بازار منځ کې له کوچني زوی سره مرمۍ ورته تېره او ګواښ ورته شوی.

نوموړي ویلي چې ورته ویل شوي، که سر پورته کړي، نو ماغزه به یې وشېندل شي.

د مبین په خبره، پخوانیو چارواکو هم خلکو ته د خپلو ذرې موټرو له ښېښو کتل او دوی هم همداسې کوي.

د طالبانو د خوست مرستیال والي خپلو امنیتي سرتېرو ته امر کړی چې پر افغان خاوره تېري کوونکي وځپي.

نوموړي ځاځي میدان ولسوالۍ ته د سفر پر مهال ویلي، هیچاته باید اجازه ورنکړل شي، چې د افغانستان پر خاوره تېری وکړي.

دا په داسې حال کې ده چې تېره ورځ د ځاځي میدان ولسوالۍ اړوند ډېورنډ فرضي کرښې ته څېرمه د طالب سرتېرو او پاکستاني ځواکونو ترمنځ نښته شوې وه.

په دغه نښته کې څلور طالب سرتېري ټپیان شوي وه او پاکستاني ځواکونو د مرګ ژوبلې په اړه څه نه دي ویلي.

لندن کې افغان قنسل رفیع اکلیل ویلي، په پام کې ده چې برېټانیا کې د افغانستان سفارت د کوربه هېواد په رسمي غوښتنه د روان کال د سپټمبر په ۲۷مه وتړل شي.

نوموړي ویلي، یاد تصمیم د کوربه هېواد د لزوم دید پر اساس نیول شوی.

هغه له ټولو همکارانو او کارکوونکو مننه کړې.

د یادونې ده چې تېره شپه د برېټانیې د بهرنیو چارو وزارت افغان سفارت ته د تړل کېدو خبر ورکړی و.

په تېر جمهوري نظام کې د خوست والي حلیم فدایي د طالبانو د لوړو زده کړو سرپرست وزیر ته د مناظرې چلنج ورکړ.

حلیم فدایي لیکلي،” د لوړو زده کړو د ټیټ وزیر همدې ټیټو خبرو په اړه د قرآن او حدیث رڼا کې حاضر یم چې له نوموړي سره د رسنیو پر وړاندې بحث وکړم.”

فدایي دغه راز زیاته کړې چې د لوړو زده کړو وزیر ان د بغدادي قاعدې حروف هم په درست ډول نشي ادا کولای.

دا په داسې حال کې ده، چې څو ورځې وړاندې د طالبانو حکومت د لوړو زده کړو سرپرست ندامحمد ندیم ویلي وه چې د نجونو د زده کړو د روا او ناروا په اړه د علماوو تحقیق روان دی.

برېټانیا لندن کې افغان سفارت ته خبرداری ورکړی چې خپلې چارې ودروي.

د برېتانیا د بهرنیو چارو وزارت ویلي چې دا پرېکړه یې لندن کې له افغان سفیر زلمي رسول سره شریکه کړې.

د یاد وزارت څخه په خپره شوې خبرپاڼه کې راغلي چې دا سفارت طالبانو ته هم نه سپاري او په سمدستي ډول به یې ټولې چارې په ټپه ودریږي.

دا په داسې حال کې ده چې المان هېواد هم تېره ورځ په بن او برلین کې د افغان قونسلګریو فعالیتونه غیر قانوني وبلل.

نامعلومو وسله والو په لکي مروت کې د پي ټي ایم غړی نویدالله او د هغه ورور وژلی.

تر اوسه چا د دغې پېښې مسؤلیت نه دی منلی.

نویدالله په دغه سیمه کې د پي ټي ایم د همغږي کوونکي په توګه کار کوو.

د پاکستان حکومت هم تر اوسه په دې اړه څه نه دي ویلي.

د طالبانو حکومت د بهرنیو چارو وزیر امیر خان متقي وايي، د نشه‌يي توکو د هغو قاچاقبرو مخه باید ونیول شي، چې د ښار په منځ کې دا توکي نورو ته رسوي.

هغه نن د نشه‌يي توکو د مخنیوي په اړه جوړې شوې غونډه کې ویلي، چې د دغو توکو مخنیوي لپاره باید قوي مبارزه وشي.

متقي سپارښتنه کړې چې په دې برخه کې باید په هر اړخیزه توکه کار وشي.

بل لورته په دې ناسته کې د طالبانو حکومت د کورنیو چارو سرپرست وزیر او سیاسي مرستیال سراج الدین حقاني له نړۍ غوښتي چې دوی د نشه‌يي تکو پر وړاندې مبارزې ته یوازې پرېنږدي.