د ایران اړوند تسنیم خبري اژانس د خپلو ځایي خبریالانو له قوله ويلي، چې د لبنان په بیروت ښار کې د اسرائیلو په ننني برید کې پنځه تنه وژل شوي دي.
دوی ویلي، چې اسرائیلي بې پیلوټه الوتکې د استوګنې یوه ودانۍ په نښه کړې، چې تر اوسه یې د پنځو تنو د وژل کیدو خبر ورکړی دی.
یاد اژانس ویلي، چې ځینو سرچینو په دغه برید کې د حزب الله د یوه لوړ رتبه غړي د وژل کېدو خبر ورکړی دی.
د طالبانو له پلاوي سره د ایران د سخت چلند او د دې ډلې د سرپرست سفیر تر احضار وروسته، په میلاد ټاور کې د اسلامي یوالي کنفرانس د غړو په نننۍ غونډه کې د طالبانو د پلاوي غړي د ایران د ملي سرود د غږولو پر مهال ودرېدل او درناوی یې وکړ.
طالب پلاوي ویلي وو چې دوی ځکه ملي سرود ته نه دریږي چې موسیقي په کې غږول کیږي، او پدې لامل یې د افغانستان ملي سرود هم بند کړی دی، خو د کوربه هیواد فشار دوی اړ کړل چې د موسیقۍ سره غږیدونکي د ایران ملي سرود ته ودریږي او درناوی یې وکړي.
د تېر جمهوري نظام د ملي امنیت رییس رحمت الله نبیل ایران ته د پېغور په شکل ویلي: “داسې ښکاري چې ښاغلي قمي او ملګرو يې ډېره هڅه کړې چې خپل مذهبي ورور یعنې د طالبانو استازي ته دلته د اوړو پوزه کېږدي؛ مګر دا کار یې له بد څخه بدتر شو.”
نوموړي ویلي، نه یوازې دا چې د ایران دغه طرحه ناکامه شوه، بلکې د طالبانو استازي د ایران ملي سرود یوه عادي ترانه وګڼله او ویې ویل چې زموږ دود دا دی چې ترانې ته نه درېږو.
ښاغلي نبیل قمي ته په کنایې کې دا متل ویلی: “ښاغلی قمي، لکه څنګه چې پخوانی متل دی: “ګرمې اوبه عذاب دی!”
رحمت الله نبیل دا څرګندونې داسې مهال کوي، چې تېره ورځ ایران کې د اسلامي یووالي کنفرانس کې د ایران ملي سرود ته طالب چارواکی نه دی درېدلی او اوس یې ددې کړنې لپاره له ایران بخښنه غوښتي ده.
که څه هم د ایران ملي سرود ته د نه درېدو په تړاو د طالبانو د حج او اوقافو مرستیال د ایران له خلکو بخښنه وغوښته؛ خو د ایران فارس خبري آژانس وایي، د دې هیواد د بهرنیو چارو وزارت ملي سرود ته د طالب چارواکي د بې احترامۍ په پار د طالبانو سرپرست سفیر یاد وزارت ته احضار کړی دی.
دغه طالب چارواکي د اسلامي یووالي کنفرانس کې د ایران ملي سرود پر مهال پر خپل ځای ناست و.
یاد طالب چارواکي په یو ویډیویي کلیپ کې ویلي، چې ایران یې ورور، ګاونډی او کلتوري شریک دی؛ خو په دوی (طالبانو) کې دا کلتور دی، چې دا ډول ترانو ته نه درېږي.
د طالبانو حکومت د ارشاد، حج او اوقافو وزارت مرستیال عزیزالرحمن منصور د ایران ملي سرود ته د نه درېدو له کبله د ایران له خلکو بښنه غوښتي.
نوموړی د اسلامي یووالي کنفرانس کې د ایران ملي سرود پر مهال پر خپل ځای ناست وو.
منصور ویلي، ایران یې ورور، ګاونډی او کلتوري شریک دی؛ خو په دوی (طالبان) کې دا کلتور دی، چې دا ډول ترانو ته نه دریږي.
د هغه په خبره دا یو قصدي عمل نه وو، خو د هغه کلتور دوام وو، چې افغانستان کې یې دوی په خپل منځي غونډو کې لري.
نوموړي ویلي، د ایران خلک د ده پر دغې کړنې خواشیني شوي، چې اوس یې دوی له امله بښنه غواړي.
د طالبانو حکومت ریاست الوزرا څخه په خپره شوې خبرپاڼه کې پر علماوو غږ شوی، چې په هغو مناظرو او رسینزو بحثونو کې ونډه وانخلي چې خلک لار ورکي کوي او تشویشونه پیدا کوي.
په خبرپاڼه کې راغلي، علما دې له هغو بحثونو هم لاس واخلي، چې د بعضې خلکو لپاره د فتنې سبب ګرځي او عامه ذهنیت یې له درک څخه عاجز وي.
دوی سپارښتنه کړې چې علما باید په رسنیو او سټیجونو کې هغه مسائیل بیان کړي، چې د عامو خلکو په کې د دنیا او اخرت ګټه وي.
دا خبرپاڼه وروسته تر هغې خپریږي، چې کابل کې په یو خصوصي ټلویزون کې طالب عالم په زغرده وویل چې د طالبانو په واکمني کې باید هیڅوک دا تمه ونه لري چې له شپږم ټولګي پورته به د نجونو ښوونځي پرانېستل شي.
د طالبانو حکومت مشر ملا هبتالله اخندزاده یو وار بیا د امربالمعروف وزارت د وروستي قانون پر اجرا ټینګار کړی.
هغه دیني عالمانو سره کتنه کې ویلي، چې عالمان هم باید په دې برخه کې کار وکړي.
نوموړي دیني عالمان د ټولنیز ثبات لپاره مهم بللي دي.
د هبت الله په خبره، پخوا د منبر او نظام ژبه په تضاد کې وه او اوس باید دا ژبه یوه وي.
د یادونې ده چې تر دې وړاندې هم د طالبانو حکومت مشر د امربالمعروف قانون پر پلي کېدو ټینګار کړی و.
یو شمېر سرچینو ویلي، چې پخوانی طالب قومندان عبدالمجید خراساني د صنعت او سوداګرۍ وزارت کې د تشبثاتو د رییس په توګه ټاکل شوی.
نوموړی د سنبلې میاشتې پر اتمه نېټه د طالبانو حکومت له لوري نیول شوی وو.
څه موده وړاندې طالب ویاند ذبیح الله مجاهد هم ویلي وو چې نوموړی په کور کینول شوی.
د یادونې ده چې عبدالحمید خراساني د طالبانو حکومت په منځ کې جنجالي څېره پېژندل کېږي.
ویل کېږي، چې ترکیې هېواد پنځه سوه افغان کډوال نېولي او بیرته یې افغانستان ته را لېږي.
یو شمېر افغان کډوال وايي، د ترکیې هېواد چارواکو ورته ویلي، چې د دایمي استوګنې کارتونه ورکوي او په دې اړه یې ورته ټاکلی ځای هم ښودلی؛ خو کله چې دوی هلته ورغلي، نو پولیسو نیولي او اوس بندیان دي.
په رسمي ډول د ترکیې دولت په دې اړه څه نه دي ویلي؛ خو له یوې مودې راهیسې یې د افغان کډوالو په جبري ډول را شړل پیل کړي دي.
د افغانستان د ملي ازادۍ ګوند ویلي، د جلا وطنه حکومت له جوړېدو هغه وخت ملاتړ کوي، چې د ولسواکۍ اصول، د وګړو بنسټيز حقونه او ټولنیز عدالت پکې په پام کې نیول شوی وي.
د رحمت الله نبیل په مشرۍ یاد ګوند دا څرګندونې وروسته تر هغې کوي، چې څو ورځې وړاندې دوستم په یوه انلاین غونډه کې د جلا وطنه حکومت د جوړېدو طرحه ورړاندې کړه.
د ګوند په اعلامیه کې راغلي، چې هر مشروع او قانوني – سیاسي بدیل دې د ملي اجماع، ټولنیز عدالت او د وګړو اساسي حقونو د تضمین پر بنسټ رامنځته شي.
اعلامیه کې ټینګار شوی، چې که دا حکومت په نړۍوالو غونډو کې د افغانستان استازولي کوي؛ نو دوی یې ملاتړي دي.