د امریکا لارنس تخنیکي پوهنتون ویلي، چې افغانستان کې د طالبانو حکومت له واک ته رسېدو وروسته، شاوخوا ۹۰ سلنه افغانان له لوږې او فقر سره مخ شوي دي.

دغه پوهنتون د یوې نظر پوښتنې له مخي ویلي، چې ۸۴ سلنه افغانان روغتیايي خدمتونو ته لاسرسی نه لري او ۸۵ سلنه افغانان د تاوتریخوالي له ګواښ سره مخ دي.

دغه نظر پوښتنه کې ګډونوالو د بشري مرستو، د بیان ازادۍ محدودیتونو، د ښځو حقونو، خوارځواکۍ او بې‌کارۍ په تړاو نظرونه شریک کړي دي.

دا په داسې حال کې ده چې په دې وروستیو کې ګڼو نړیوالو بنسټونو د افغانستان پر اقتصادي وضعیت اندېښنه ښودلې.

د اسراییلو د لومړي وزیر بنیامین نتانیاهو دفتر په یوه بیان کې ویلي، چې د اسراییلو او حماس استازو د جمعې په ورځ په دوحه کې د غزې د اوربند او د یرغمل شویو بندیانو د خلاصون تړون لاسلیک کړ.

یاد دفتر ويلي، مرکچي پلاوي څو شېبې وړاندې نتنياهو ته زنګ وکړ او د تړون د لاسليکولو اعلان يې وکړ.

د اسراییلو کابینه به په څو ساعتونو کې پر دغه تړون رایه ورکړي.

د هېواد پخواني ولسمشر حامد کرزي د ‎ترکیې له سفیر جنګ اونال سره کتلي.

ښاغلي کرزي پر خپله ایکس پاڼه لیکلي چې په دې کتنه کې یې د دواړو هېوادونو ترمنځ د تاریخي او دوستانه اړیکو د یادونې سربیره، د افغانستان له خلکو سره د ترکیې له مرستو په ځانگړي توگه د تعلیم د ودې او تقویی په برخه کې د همکاریو او ‎افغان ځوانانو ته د تحصیلي بورسونو له ورکړې مننه وکړه.

دا په داسې حال کې ده چې ترکیې د زیات شمېر تحصیلي بورسونو د ورکړې اعلان کړی، چې افغانستان هم په کې شامل دی.

د افغان کرکټ ملي لوبډلې په ملاتړ برېټانیا کې مېشتو افغانانو د دغه هېواد د پارلمان مخته لاریون پیل کړی دی.

دغه لاریون کوونکي په خپلو شعارونو کې وایي:«موږ د نجونو د تعلیم حق هم غواړو او کرکټ هم غواړو.»

دغې غونډه کې بهر مېشتو افغانو مېرمنو هم ګډون کړی او له افغان کرکټ ملي لوبډلې څخه یې خپل ملاتړ څرکند کړی.

دا په داسې حال کې ده چې په دې وروستیو کې فوزیه کوفي او یو شمېر نورو سیاستوالو د بریتانیې له کرکټ بورډ غوښتي وو چې افغان کرکټ لوبډلې سره لوبې لغوه کړي.

د امریکا د منتخب ولسمشر ډونالډ ټرمپ له لوري د بهرنیو چارو وزارت ته نوماند سناتور مارکو روبیو ویلي، ایران په ډېرو سختو شرایطو کې قرار لري او اجازه باید ورنکړل شي چې په اټومي وسلو سمبال شي.

هغه ویلي، شعیه‌وو په لبنان او سوریه کې ماتې خوړلې او ایران له همدې کبله هم له بد وضعیت سره مخ دی.

سناتور زیاتوي، دوی د ایران له خلکو سره کومه ستونزه نه لري؛ خو د دغه هېواد اوسني حاکمان د ایران د خلکو استازي نه دي.

د خیبر پښتونخوا په کورمه کې نن سهار د خوراکي توکو او درملو پر کاروان برید شوی چې له امله یې څلور امنیتي سرتیري ټپیان شوي دي.

ویل کېږي چې په دغه برید کې ملکيانو ته هم مرګ ژوبله اوښتې؛ خو د تلفاتو په اړه یې معلومات نه دي ورکړل شوي.

پاکستاني پولیس وایي د پېښې په اړه یې پلټنې پیل کړې دي.

اسوشټیډ پریس وایي، د اسرائیل کابینه به د اوربند تړون تر هغې تصویب نه کړي تر څو چې حماس خپلې غوښتنې بېرته نه وي اخیستې.

سرچینه زیاتوي، اسرائیل باور لري چې حماس د لا زیاتو امتیازاتو ترلاسه کولو لپاره د تړون ځینې برخې بدلې کړې دي.

ټاکل شوې وه چې د اسرائیل کابینه په دې اړه نن ناسته وکړي.

د طالبانو حکومت د عدلیې وزارت د طالبانو د مشر شیخ هبت‌الله اخوندزاده هغه حکم خپور کړی چې له مخې یې ددغه حکومت هیڅ یو مسوول کس په یوه وخت دوه ځایه دنده نشي کولای.

د دغه حکم پر بنسټ که دغه مسوول کس په ټیټه کچه وي او که لوړ رتبه وي، که دوه ځایه دنده لري، یو ځای دې پریږدي.

دا حکم داسې مهال رسنیز کېږي چې یو شمېر طالبان په حکومتي چوکاټ کې دوه ځایه دندې کوي.

پر دې سربېره بیا دا نیوکه هم کېږي چې د طالبانو حکومت ټولې ادارې له خپل خپلوانو ډکې دي.

د طالبانو حکومت د اسراییلو او حماس ترمنځ د اوربند هرکلی کړی.

د طالبانو حکومت په یوه اعلامیه کې د حماس او اسراییلو ترمنځ د اوربند د هوکړې له امله له منځګړو هېوادونو په ځانګړې ډول له قطر او مصر څخه مننه کړې.

اعلامیه کې راغلي دا هوکړه په غزه کې د حماس د مقاومت او غزې د خلکو د صبر پایله ده.

دوی ټینګار کړی، چې هوکړه باید په بشپړ ډول عملي او دایمي اوربند ته لاره هواره او غزې ته بشري مرستې پیل شي.

د طالبانو حکومت ویلي، نړیوال باید دا ډاډ تر لاسه کړي چې اسرائیل د هوکړې ټولې برخې په بشپړ ډول پلي کړي.

دوی یو وار بیا ویلي چې د غزې د ستونزو حل د خپلواک هېواد په توګه د فلسطین پېژندل دي.

هندي رسنیو خبر ورکړی، چې د بالیووډ مشهور ستوري سیف علي خان او دده مېرمن کرینه کپور کور باندې د هند په ممبۍ ښار کې غلو برید کړی چې سیف علي خان سخت ټپي شوی دی.

هندوستان ټایمز ورځپاڼې د هندي ډاکټرانو له قوله ویلي چې سیف علي خان د پنجشنبې په سهار درې نیمې بجې روغتون ته وړل شوی او پر بدن یې شپږ ټپونه دي.

بل لورته د ممبۍ پولیس وايي، بریدګر له پېښې وروسته تښتېدلی او ځواکونه یې په لټه کې دي.

سیف علي خان د هندي بالیووډ یو له مشهورو ستورو څخه دی چې په لسګونو مشهورو فلمونو کې راڅرګند شوی دی.