د طالبانو حکومت ویاند ذبیح الله مجاهد وايي، د باګرام په اړه د ټرمپ څرګندونې ناسمې دي او دغه راز هغه وسلې چې له دوی څخه نیول شوي اوس مهال د دوی په واک کې دي.

نوموړی وايي، امریکا شل کاله د افغانستان خلک وژلي، ځورولي او اوس باید ځواب ورکړي.

مجاهد یوې ایرانۍ رسنۍ سره په مرکه کې ویلي، چې د طالبانو حکومت له امریکا سره د رسمي تعامل غوښتونکي دی او که دا هېواد د فشار له لارې د خپلو اهدافو د پوره کېدو نیت لري؛ نو دا چاره هیڅ پایله نه ورکوي.

هغه له امریکا غوښتي چې د افغانستان په چارو کې لاسوهنه ونه کړي او په ریښتیني معنی له دوی سره تعامل ته را ودانګي.

د طالبانو حکومت د امربالمعروف او نهې عن المنکر وزارت ویاند سیف الاسلام خیبر وایي، چې تېرو شلو کالو کې د ښځو له حقونو سیاسي ګټه اخیستل کېده.

نوموړی وایي، دا چاره اوس هم د یو شمېر نړیوالو سازمانونو له اړخه روانه ده.

هغه ویلي، چې د دوی حکومت کې د ښځو هر ډول شرعي حقونه تامین شوي دي.

خیبر دغه راز زیاته کړې، چې ځینې کړۍ هڅه کوي چې له دې لارې افغانستان کې د پردي کلتور دودولو ته لاره هواره کړي.

نامعلومو وسله‌والو د خیبر پښتونخوا د کرم سیمې کې د امنیتي ځواکونو پر یوه پوسته برید کړی.

په دې برید کې درې پاکستاني سرتېري وژل شوي او څلور نور ټپیان شوي دي.

برید د درنو او اتومات وسلو په وسیله د کرم میانه د “تکره پټي” په سیمه کې ترسره شوی.

تر اوسه هېڅ ډلې د دې برید مسوولیت نه دی منلی، خو ډېری وخت دا ډول بریدونه د ټي‌ټي‌پي ډله ترسره کوي.

د طالبانو حکومت ویاند ذبیح الله مجاهد وايي، دوی له پاکستان سره ښې اړیکې غواړي؛ خو دغه هېواد ډېر کله د خپل بام واورې پر دوی ور اچوي.

نوموړی وايي، پاکستان ادعا کوي، چې دوی ټي‌ټي‌پي ته ځای ورکړی؛ خو دا خبره غلطه ده او پاکستان باید خپل امنیت خپله ونیسي.

هغه ویلي، دوی نه غواړي، چې د افغانستان خاوره د نورو پر ضد وکارول شي.

د «احصایې نړۍ» په نوم د یو بنسټ تازه څېړنې ښيي، چې افغانستان د ښځو لپاره د نړۍ د ناامنه هېوادونو په سر کې دی.

دغه بنسټ د هغو هېوادونو یو لېست خپور کړی، چې مېرمنې په کې خوندي نه دي.

په دې لېست کې لومړی افغانستان، ورپسې یمن، مرکزي افریقا، جنوبي سوډان او یو شمېر نور هېوادونه ښودل شوي، چې ښځې په کې د ژوند د خوندیتوب له پلوه تر ټولو زیاتې ځوریږي.

دا په داسې حال کې ده، چې د مارچ اتمې په مناسبت ګڼو بنسټونو، فعالانو او چارواکو ویلي، چې طالبان باید افغانستان کې د ښځو خلاف زور زیاتی او بندیزونه پای ته ورسوي.

د طالبانو حکومت ویاند ذبیح الله مجاهد وایي، چې د دوی په حکومت کې هېڅ ډول اختلاقات نشته.

ښاغلي مجاهد له یوې ایرانۍ رسنۍ سره په خبرو کې ویلي، چې دوی د پخوانیو اختلافاتو د له منځه وړلو په برخه کې واضح نقش لوبولی او پخوا یې لا ټولو اختلافاتو ته نه ویلې ده.

نوموړی زیاتوي، د طالبانو د حکومت په واکمني کې هیڅ ډول اختلاف نشته او یو نیم وخت یوازې د خبرو او لید لوري اختلاف وي، چې دا ان په یوې کورنۍ کې هم وي او دا په دې معنی نه ده، چې چا دې د چا پر وړاندې جبهه نیولې وي او یا یې هم بغاوت کړی وي.

مجاهد زیاتوي، چې امریکا او ناټو د دوی پر ضد له فزیکي جګړې وروسته سړه جګړه مخ ته وړي، چې د دوی په اړه د اختلاف مسئله هم د دغو تبلیغاتو برخه ده.

د مارچ اتمې په مناسبت یو شمېر افغان فعالانو په یو شمېر هېوادونو کې د یوې اعتراضیه غونډې په ترڅ کې له نړیوالو غوښتي، چې د طالبانو له لوري د افغان ښځو پر وړاندې باید روان تاوتریخوالی پای ته ورسېږي.

دوی افغانستان کې د جنسیتي اپارتاید په اړه په ټینګار سره ویلي، چې نړیواله ټولنه باید طالبان د بشر ضد کړنو په کولو محاکمه کړي.

دوی، چې په کاناډا، المان او یو شمېر نورو هېوادونو کې لاریونونه کړي وو ویلي، چې افغانستان کې جنسیتي اپارتاید په رسمیت وپېژني.

د طالبانو حکومت د بهرنیو چارو وزارت سرپرست مولوي امیرخان متقي په یو رسمي سفر عمان ته ولاړ.

د یاد وزارت د عامه اړیکو رئیس ضیا احمد تکل وایي، نوموړی به هلته د عمان د بهرنیو چارو له وزیر او یو شمېر نورو چارواکو سره وګوري.

د سرچینې د معلوماتو پر اساس، متقي به په دې سفر کې د سیاسي او اقتصادي اړیکو پر پیاوړتیا او دوو اړخیزو اړیکو پر پراختیا خبرې وکړي.

د نجونو د زده‌کړو د حقونو یو ښوونیز مدافع بنسټ ویلي، چې دوی سل زرو نجونو ته د زده‌کړو اسانتیاوې برابروي.

د دغه بنسټ مسوولینې وايي، چې په دغو ښځو کې به یې ۶۵ سلنه نجونې وي.

هغوی په افغانستان کې د نجونو او ښځو پر زده‌کړو ټینګار کړی او له ټولو یې غوښتي چې په دې برخه کې د هر ډول پروګرام ملاتړ وکړي.

د دوی په خبره، دا پروګرام یې د ۲۰۲۶ کال تر پایه په هېواد کې پلې کېږي.

تاجکستان کې د افغانستان سفیر ظاهر اغبر وايي، طالبانو افغانستان د ښځو لپاره په یو زندان بدل کړی.

هغه د مارچ اتمې په مناسبت یوې غونډې ته ویلي، چې طالبان په امازون ځنګل کې د بومي وګړو په څېر دي او له ابتدايي ټولنو هم وروسته پاتې ذهنیت لري.

نوموړي زیاته کړې، چې د طالبانو له لوري افغان ښځې له خپلو هر ډول حقونو بې برخې دي.

د یادونې ده، چې د مارچ اتمې په مناسبت ګڼو بنسټونو یو وار بیا له طالبانو وغوښتل چې د افغان ښځو حقونه ورکړي.