پاکستاني پولیسو قومي مشر ملک نصیر کوکي خېل نیولی.
سرچینې وایي، نوموړی د پولیسو یو افسر دفتر ته ور غوښتی و، چې وروسته یې له خپلو درې نورو ملګرو سره نیولی وو.
بل لورته خیبر کې ځایي خلکو په دې اړه لاریون کړی.
ملک نصیر احمد د کوکي خېل قوم مشر او د پښتون ژغورنې غورځنګ مخکښ غړی وو.
د ننګرهار په جلال اباد ښار کې د هند قونسلګري پر یو افغان ژباړن ودود خان برید شوی.
سیمهییزې سرچینې وایي، په برید کې ودود خان او یو بل ملګری یې ټپیان شوي؛ خو ساتونکی یې وژل شوی دی.
تر اوسه د برید مسؤلیت چا نه دی اخیستی.
دا برید په داسې حال کې کېږي، چې په دې وروستیو کې د طالبانو له لوري د کابل او ممبي ترمنځ د اړیکو د پیاوړتیا راپورونه ورکړل شوې وه.
د بشارالاسد د حکومت له نسکورېدو وروسته؛ نږدې ۲۳ زره سوریایي وګړو ترکیه پرېښي.
د ترکیې د کورنیو چارو وزارت ویلي، چې په تېرو دوو اوونیو کې سوریې ته له ترکیې څخه د بېرته ستنېدونکو وګړو شمېر د پخوا په پرتله شپږ برابره زیات شوی.
د یادونې ده چې نه یوازې له ترکیې؛ بلکې له ګڼو نورو اروپایي هېوادونو هم سوریې ته خپل وګړي را ستانه شوي.
تحریک طالبان پاکستان ډلې د سلطان محمود غزنوي په اړه د پاکستان د دفاع وزیر خواجه اصف وروستۍ څرګندونې وغندلې.
یادې ډلې په یوه اعلامیه کې ویلي، چې د پاکستان دفاع وزیر ناپوه دی او دا د هغه لپاره د شرم وړ کار دی.
اعلامیه کې راغلي، خواجه اصف د خپل هېواد د دفاعي سیستم په اړه هم معلومات نه لري؛ خو په زیاتې بې شرمۍ د مسلمان ملت اتلانو ته سپکاوی کوي.
خواجه اصف یوه مرکه کې ویلي وو چې سلطان محمود غزنوي یو ډاکو او غل وو.
طالبانو هرات کې له شپږم ټولګي پورته نجونې له کورسونو منع کړې.
دوی په یو فرمان کې ټولو ښوونیزو مرکزونو ته ویلي، چې له شپږم ټولګي پورته نجونې نورې ور ونه غواړي.
دغه فرمان کې په جدي توګه د دغه بنديز د عملي کولو غوښتنه شوې ده.
د یادونې ده چې تر دې وړاندې طالبانو د نجونو پر مخ ښوونځي، پوهنتونونه، طبي انستیتوتونه او دا ځل ورباندې ښوونیز مرکزونه هم وتړل شول.
په داسې حال کې چې طالبان امنیت خپله لاسته راوړنه بولي، تازه د مقاومت په نوم جبهې ادعا کړې چې تېره یوه میاشت کې یې ۴۲ طالبان وژلي.
دوی ویلي، چې تېره یوه میاشت د هېواد اتو ولایتونو کې پر طالبانو ۲۵ بریدونه کړي، چې ۴۲ یې وژلي او ۲۹ نور یې ټپیان کړي دی.
د سرچینې د معلوماتو له مخې، دا بریدونه په کابل، هرات، بادغیس، فراه، بدخشان، پروان، کاپیسا او کندوز ولایتونو کې شوي.
اسرائیل پر غزې تازه بریدونه کړي، چې ۵۸ کسان یې وژلي دي.
د فلسطین روغتیا وزارت ویلي، چې دغو بریدونو کې ۸۶ نور ټپیان دي.
د سرچینې د معلوماتو له مخې، لاهم یو شمېر کسان تر خاورو لاندې دي.
دا بریدونه داسې مهال شوي، چې تېره ورځ د اسرائیل دفاع وزیر ویلي وو، چې دوی به د حماس مشران او دغه ډله له منځه وړي.
د روسیې ولسمشر ولادمیر پوتین سکرتر یوري اوشاکوف وایي، پوتین غواړي د سوریې له پخواني ولسمشر بشارالاسد سره وګوري.
نوموړي د دغې لیدنې نېټه نه ده په ډاګه کړې؛ خو زیاتوي چې دا لیدنه به نږدې وخت کې ترسره شي.
تر دې وړاندې پوتین ویلي وو چې له بشارالاسد سره د لیدلو هوډ لري.
د یادونې ده چې د دمشق تر سقوط وروسته بشارالاسد مسکو ته ولاړ.
اوکرایني چارواکي وایي، چې د روسیې په کازان کې د ایراني بېپیلوټه الوتکو په ساتنځای کې اور لګېدلی.
دوی ویلي، په دغه ځای کې ۱۳۶ الوتکې وې.
نیوزویک د سرچینو په حواله ویلي چې د دغو الوتکو ارزښت ۱۶ میلیونو ډالرو ته رسېده.
روسیې چارواکو تر اوسه په دې اړه څه نه دي ویلي.
ورف جرمي وسله والې ډلې د هایتي ښار په ساحلي ګاونډ سیته سولیل کې لږ تر لږه ۲۰۷ کسان وژلي دي.
د ملګرو ملتونو د بشري حقونو د عالي کمېشنرۍ د دفتر د راپور پر اساس، دا کسان له یوې اوونۍ په کمه موده کې وژل شوي، چې ۷۳ یې ښځې دي.
د سرچینې د معلوماتو له مخې، دا بریدونه د یادې ډلې د درې سوه غړو له لوري هغه مهال شوي چې د ووډ مذهبي مشرانو د دغې ډلې مشر د یاد مذهب په سپکاوي تورن کړی وو.
ددغې پېښې ډیری قربانیان د ووډو معبدونو او مذهبي مراسمو څخه وتښتول شول.