د هرات ولایت د طالبانو له ولایتي دفتره خپره شوې خبرپاڼه کې راغلي، چې د سلما بند اوبه د هریرود سیند ته خوشې شوې دي.
خبرپاڼه کې راغلي، چې د دغه کار موخه د کروندګرو لپاره د اړتیا وړ اوبو برابرېدل دي.
دوی د سیمې له خلکو غوښتي، چې د سیند په غاړو کې له تګ راتګ ډډه وکړي.
د یادونې ده، چې یاد بند نن ۱۲بجې خوشې شوی دی.
تسنیم خبري آژانس وایي، ټاکل شوې چې د ایران د بهرنیو چارو وزیر عباس عراقچي او د امریکا د ځانګړي استازي اسټیو ویتکاف د ایران او امریکا ترمنځ د خبرو مشري وکړي.
دا خبرې به د شنبې په ورځ د عمان په پلازمېنه مسقط کې ترسره شي او د تسنیم په وینا، غیرمستقیمې به وي.
د ایران د بهرنیو چارو وزیر عباس عراقچي هم دا خبرې تایید کړي او ویلي یې دي چې دا لیدنه به په لوړه سطحه ترسره شي.
نوموړي ټینګار کړی چې دا خبرې مستقیمې نهدي.
بلخوا د امریکا پخواني ولسمشر ډونالډ ټرمپ، چې له اسرائیلي صدراعظم بنیامین نتانیاهو سره یې له لیدنې وروسته خبرې کولې، دا خبرې مستقیمې بللې او ځای یې نهدی څرګند کړی.
ټرمپ خبرداری ورکړی: «که دا خبرې بېنتیجې پاتې شي، ایران به له جدي خطر سره مخ شي. دا رژیم باید اټومي وسلې ترلاسه نهکړي. بېتوافقه سبا، د ایران لپاره خطرناکه ورځ ده.»
د طالبانو حکومت د کډوالو او بېرته راستنېدونکو چارو وزارت ویلي، چې پاکستان کې د افغان کډوالو د مالونو لوټل غیر انساني او غیر اسلامي کړنه ده.
دوی ویلي، چې دا کار د ټولو نړیوالو بشري حقونو خلاف عمل دی.
اعلامیه کې له پاکستان غوښتل شوي، چې دا تاوتریخوالی او غیر انساني کړنه ژر تر ژره پای ته ورسوي.
اعلامیه زیاتوي، هیڅوک باید له افغان کډوالو څخه د سیاسي ابزارو په توګه کار وانخلي.
د یادونې ده چې تر دې وړاندې د طالبانو د رییس الوزرا په مشرۍ ناسته کې هم له پاکستان غوښتل شوي، چې له دې کړنې لاس واخلي.
د بخښنې نړیوال سازمان د ۲۰۲۴ کال په کلني راپور کې ویلي چې ایران له ټولو هېوادونو زیات اعدامونه کړي او د نړۍ د اعدامونو نږدې دوه پر درېیمه برخه پکې ترسره شوې ده.
یاد سازمان ویلي، په تېر میلادي کال کې لږ تر لږه ۱۵۱۸ اعدامونه په ټوله نړۍ کې ثبت شوي چې ۹۷۲ یې یوازې په ایران کې شوي دي.
دغه سازمان ویلي، دا شمېره د ۲۰۲۳ کال پرتله ډېره لوړه ده، چې په هغه کال کې ۸۵۳ اعدامونه ثبت شوي وو.
دې سازمان زیاته کړې، چې ایران د اعدام سزا د خلکو د وېرولو، مخالفانو د ځپلو او د مخدره موادو د جرمونو د مجازات لپاره کاروي.
د بخښنې نړیوال سازمان مشرې، اګنس کالامار ویلي: «ایراني چارواکي د ژوند حق ته هېڅ ارزښت نه ورکوي او د اعدام سزا کاروي څو خپل مخالفان چوپ وساتي.»
کابل کې د ایران سفیر علي رضا بیکدلي د یاد هېواد د بهرنیو چارو وزیر عباس عراقچي سره کتلي.
له یاد سفارت څخه خپره شوې خبرپاڼه کې راغلي، چې عراقچي د کابل او تهران ترمنځ پر ګډې همکارۍ ټینګار کړی او ویلي دي، چې د افغان وګړو د بېرته ستنولو په اړه پرېکړې باید په جدي ډول وڅارل شي.
تر دې وړاندې هم ایراني چارواکو له کابل سره د ښو اړیکو پر لرلو ټینګار کړی وو.
رویټرز خبري اژانس ویلي، چې اسرائیلي پوځ د غزې په هغو سیمو کې د ځمکې پاکولو او څار برجونو جوړول پیل کړي، چې په دې وروستیو کې یې نیولې دي.
رویټرز زیاتوي، اسرائیل له دې سیمې څخه خلک کډه کولو ته اړ اېستلي.
بل لورته الجزیرې ویلي، چې اسرائیل د اوربند له پای ته رسېدو وروسته ۴۰۰ زره کسان خپلو مېنو پرېښودو ته اړ کړي.
د ازبکستان ولسمشر شوکت میرضیایف ویلي چې نړۍ باید افغانستان منزوي نهکړي او له طالبانو سره تعامل او رغنده خبرې باید دوام ومومي.
نوموړي دغه څرګندونې د تاشکند ښار کې د بینالمجالس اتحادیې ۱۵۰مې ناستې ته په وینا کې کړې.
هغه زیاته کړې: «موږ باید خپل ګاونډی افغانستان هېر نهکړو. د دې هېواد له نړیوالې انزوا څخه ژغورل او له اوسنیو چارواکو سره خبرې کول ډېر مهم دي.»
میرضیایف همداراز خبرداری ورکړی چې روان نړیوال کړکېچونه د سیمې او نړۍ سوله له خطر سره مخ کوي.
هغه دغه راز ویلي، چې ازبکستان د ډیپلوماټیکو لارو د شخړو د حل ملاتړ کوي او سولهییزې خبرې اترې باید د اختلافاتو د هواري اساسي وسیله وي.
رویټرز خبري آژانس راپور ورکړی چې د امریکا د ولسمشر ډونالډ ټرمپ اداره غواړي له افغانستان، یمن او یو شمېر نورو هېوادونو سره خپلې بشردوستانه مرستې پای ته ورسوي.
دا راپور د امریکا د نړیوالې پرمختیا ادارې د بشرپالنې چارو د پخواني مشر او ۹ نورو سرچینو له قوله ورکړل شوی دی.
د «مرستو لپاره دریځ» په نوم د یوې ولسي ډلې د شمېرو له مخې، د ټرمپ حکومت له ۱.۳ میلیارده ډالرو څخه زیاتې مرستې کمې کړې دي، چې پکې ۵۶۲ میلیونه ډالر افغانستان، ۱۰۷ میلیونه یمن، ۱۷۰ میلیونه سومالیا، ۲۳۷ میلیونه سوریه او ۱۲ میلیونه ډالر غزې ته ټاکل شوي وو.
په ورته وخت کې، د ملګرو ملتونو د خوراکي پروګرام مشره سیندي مککین ویلي چې د دغو مرستو کمښت به میلیونونه کسان د سختې لوږې له امله له ژوند بېبرخې کړي.
نوموړې دغه پرېکړه «د اعدام حکم» بللی او وایي د ټرمپ له حکومت سره په دې اړه تماسونه لري.
د سعودي عربستان د حج او عمرې وزارت اعلان کړی، چې د ۱۴۴۶ هجري قمري کال د شوال ۱۵مه نېټه سعودي عربستان ته د عمره کوونکو د ننوتلو د وروستۍ نېټې په توګه ټاکل شوې.
له یاد وزارت څخه خپره شوې خبرپاڼه کې راغلي، چې د ۱۴۴۶ د ذوالقعدې میاشتې لومړۍ نېټه، وروستۍ ورځ ده چې عمره کوونکي باید له سعودي عربستان څخه ووځي.
یاد وزارت دغه راز ویلي، کوم عمره کوونکی چې تر دغې نېټې وروسته هم پاتې شي؛ نو جزا به وویني.
د طالبانو حکومت د رئیس الوزرا په مشرۍ له افغان کډوالو سره د پاکستاني پوځ د ناوړه چلند او جبري را اېستلو په اړه ځانګړې غونډه شوې.
دې غونډه کې د کابینې غړي وو، چې له پاکستان څخه یې د افغان کډوالو را شړل غیر انساني کړنه او د ټولو اصولو خلاف عمل بللی.
دوی د پاکستان له سیاسي ګوندونو غوښتي، چې په دې اړه اسلامي او د ګاونډیتوب مسؤلیت ادا کړي.
د طالبانو حکومت په دې غونډه کې پر نړیوالو بنسټونو هم غږ کړی، چې د افغان کډوالو د را اېستلو په برخه مې مسؤلیت ادا کړي، ترڅو افغان کډوال په باعزته ډول را ووېستل شي.