لاهم له بلوڅ ازادي غوښتونکو سره ۱۵۰ پاکستاني پوځیان یرغمل پاتې دي.
که څه هم یادې ډلې تېره شپه ۶۰ پوځیان ووژل؛ خو ۱۵۰ تنه ورسره اوس هم برمته دي.
دوی پر جعفر ایکسپریس اورګاډي د برید پرمهال ۴۲۶ کسان نیولي وو چې ۲۱۲ ملکي او ۲۱۴ یې د پاکستاني پوځ سرتېري وو.
بلوڅو په لومړي پړاو کې ټول ملکیان ازاد کړي وو.
د یادونې ده چې بلوڅو د پاکستان حکومت ته ۴۸ ساعته ضرب الاجل ورکړی وو، چې د دوی بندیان ازاد کړي؛ ګنې برمته شوي به ووژني.
اوس مهال د دغه ضرب الاجل یوازې څو ساعته پاتې دي.
یو شمېر سرچینې وایي، چې د طالبانو حکومت تر واک لاندې د مالیې وزارت د کندهار له لوري کابل کې د جرګې د لګښت معلومولو امر ترلاسه کړی.
سرچینو زیاته کړې، چې د دې جرګې د بودیجې برابرولو هڅې هم پیل شوي دي.
د دغې جرګې په تړاو څو ورځې وړاندې جهادي مشر عبدالرب رسول سیاف ویلي، چې د طالبانو جرګه به د خلکو ستونزې حل نه کړي.
نوموړي د طالبانو له لوري د جرګې جوړول د هېواد د تاریخي دودونو سپکاوی بللی دی.
هغه دا هم ویلي و چې دا جرګه یوازې د طالبانو لپاره ده او بل څوک پکې ګډون نه لري.
د طالبانو حکومت تر اوسه ددې جرګې په تړاو رسمي څه نه دي ویلي.
د حزب اسلامي د مشر ګلبدین حکمتیار زوی، حبیب الرحمان حکمتیار وایي، چې د طالبانو جرګه د دوی د داخلي اختلافونو د مدیریت لپاره جوړیږي.
نوموړي پر خپله ایکسپاڼه لیکلي، چې دا جرګه د طالبانو د مشر ملا هبتالله د واک د پیاوړتیا لپاره ده.
نوموړی وایي:«زما په نظر، هغه جرګه چې طالبان یې جوړول غواړي یوازې یو هدف لري، او هغه دا چې ملا هبت الله ته د طالبانو په ډله کې لا ډیر مشروعیت او ډیر ځواک ورکړی، ترڅو هغه طالبان چې بدلون غواړي، هغه د مشرتابه وړ نه ګڼي، او په خپلو لیکو کې واک لري، څنډې ته کړي او د تل لپاره له دوی څخه خلاص شي.»
هغه وایي، دوی په خپل منځ کې هم نیوکه نه مني او منتقد پوځي محکمې ته لیږي او په وینا یې دوی له الف څخه تر یا پورې هرڅه لپاره طالب وړ ګڼی او طالب یوازینی مسلمان، مومن، صادق، اهل کار، تعلیم یافته، او وړ کس ورته ښکاري، پاتې نور افغانان سپک او بې ارزښته ګڼل کیږي.
حکمتیار دغه راز ویلي، چې دا غونډه به هیڅکله د خلکو لپاره نه وي او دوی پری ښه پوهیږي چې دا د هیچا لپاره د منلو وړ نه ده، یوازې د خپلو لیکو د تصفیی لپاره ورته اړتیا لري.
هغه دا هم ویلي، چې انحصاري شوراګانې تل ناکامې شوې دي؛ خو دیکتاتوران تل هڅه کوي چې داسې شوراګانې او جرګی جوړې کړي ترڅو خپل مطلق واک وساتي او مخالفین له منځه یوسي.
برېتانیې له روسیې څخه د دوی د دوه دیپلوماتانو د شړلو غبرګون کې د روسیې سفیر احضار او د یو روسي دیپلومات باور لیک لغوه کړ.
بریتانیې ویلي، روسیې هڅه کوي مسکو کې د دوی د سفارت چارې وځنډوي؛ خو په دې اړه هیڅ بدو پایلو ته پام نه کوي.
د بریتانیې د بهرنیو چارو وزارت خبرداری ورکړی، چې د روسیې هر اقدام ته به غبرګون ښیي.
د عربي هېوادونو د بهرنیو چارو وزیرانو یو ځل بیا ټینګار کړی چې د امریکا د ولسمشر، ډانلډ ټرمپ له استازي سره به د غزې د بیارغونې اړوند د هغه پلان په اړه سلا مشورو ته دوام ورکړي چې مصر وړاندې کړی.
دوی د چهارشنبې ورځ له یوې غونډې وروسته یوه ګډه اعلامیه خپره کړې چې پکې ویل شوي، په دې اړه به د امریکا له ځانګړي استازي سره ناستو ته دوام ورکړي.
ټرمپ تر دې مخکې وړاندیز کړی چې مصر او نور عربي هېوادونه دې د غزې اوسېدونکي خپلو هېوادونو ته ولیږدوي ترڅو امریکا دغه سیمه خپله خاوره وګرځوي او له سره یې ورغوي.
روسیې له اوکراین سره د جګړې د پایته رسولو په موخه امریکا ته خپلې غوښتنې وړاندې کړې دي.
رویټرز د دوو سرچینو له قوله دا خبر ورکړی؛ خو په دې اړه لاهم زیات جزیات نشته.
وړاندې تر دې په دې اړه د روسیې او امریکا چارواکو مخامخ او ان لاین یو شمېر غونډې کړې.
ویل کېږي چې د روسیې غوښتنې تر ډېره د پخوانیو غوښتنو په څېر دي.
د روسیې پخوانۍ غوښتنې د نیول شویو سیمو په رسمیت پېژندل، ناټو ته د اوکراین نه ور داخلېدل او په دغه هېواد کې د بهرنیو ځواکونو نه حضور شامل دي.
دا په داسې حال کې ده چې اوس مهال د اوکراین جګړې په اړه د سعودي په کوربهتوب مذاکرات روان دي.
ټاکل شوې چې نن د واخان سړک د دویم فاز د چارو تړون لاسلیک شي.
د طالبانو حکومت تر واک لاندې د کلیو د بیارغونې او پراختیا وزارت پر اېکس پاڼه د دغه خبر پخلی کړی.
د دغې لارې د جوړولو چارې، چې بدخشان د چین له یارکند سیمې سره نښلوي د ۵۰ کیلومټره په اوږدوالي سره تېر کال د کوچني پامیر له بزای ګُنبد سیمې پیل شوې دي.
د طالبانو حکومت امنیتي ادارې وایي، هغه غل یې نیولی، چې له بهر څخه افغانستان ته ستنېدونکي کسان به یې د کابل نړیوال هوایي ډګر څخه تر وتلو وروسته لوټل.
دغه کس قاري احمد ولد عبدالحنان نومیږي او له یادو کسانو څخه به یې د طالب استخباراتو په نوم قیمتي توکي او نغدې پیسې اخیستلې.
امنیتي ادارو یوې اعلامیې کې ویلي چې قاري احمد ګڼو کسانو پسې کور ته هم ورغلی و.
یو شمېر سرچینو رسنیو ته ویلي، چې تېره ورځ ماښام شاوخوا ۷:۳۰ بجې د کندوز-خاناباد په لویه لاره د طالب سرتېرو او نامعلومو وسلوالو ترمنځ نښته رامنځته شوې.
د سرچینو په وینا، دا نښته هغه وخت پیل شوه کله چې نامعلومو وسلوالو د طالبانو پر یوه پوسته د خواجه پسته په سیمه کې برید وکړ، چې تر یوه وخته یې دوام درلود.
د دغې پېښې د تلفاتو د کره شمېرې په اړه څه نه دي ویل شوي.
د طالبانو حکومت هم تر اوسه د دې پېښې په اړه څه نه دي ویلي.
د روسیې راشاټوډي دولتي خبري شبکې راپور ورکړی چې آلمان هڅه کوي افغان کډوال اوکراین ته ولېږي ترڅو د اوکرایني ځواکونو ترڅنګ د روسیې پر ضد وجنګېږي.
دې رسنۍ د یوه باوري سرچیني له قوله لیکلي چې آلمان غواړي دا کډوال د اوکراین د نړیوال دفاعي لېژیون سره یوځای شي.
د اوکراین نړیوال دفاعي لېژیون د بهرنیو رضاکارانو څخه جوړ شوی دی.
راشاټوډي همداراز لیکلي چې د آلمان یو شمېر امنیتي کارپوهان د افغان کډوالو د جګړې ته استولو سخت مخالف دي.
د راپور له مخې، دا کارپوهان باور لري چې د افغان کډوالو، چې ډېری یې د سختدریځو اسلامي افکارو پیروان دي، د ناتو لخوا د چټکو نظامي روزنیزو کورسونو سره یوځای کول، د آلمان لپاره احتمالي ترهګریز ګواښونه زیاتوي.
تر اوسه د روسیې، اوکراین او آلمان چارواکو په دې اړه څه نه دي ویلي.