د افغانستان لپاره د پاکستان ځانګړی استازی محمد صادق نن کابل ته رسیدلی.

هغه ویلي، چې د دې سفر پر مهال به له طالب چارواکو سره مهمې لیدنې ولري.

تر دې وړاندې، د پاکستان د بهرنیو چارو وزیر اسحاق ډار د حمل میاشتې په ۳۰مه د یو پلاوي په مشرۍ کابل ته تللی و.

تحریک طالبان پاکستان ډله وایي، چې د جنوبي وزیرستان شکئ سیمه کې یې پر یوه پوځي کمپ برید کې یې ۲۰ پاکستاني عسکر وژلي او ۵ نور یې ټپیان کړي دي.

دغې ډلې ویلي، برید تېره شپه د ډان‌ګېټ پر کمپ ترسره شوی او په کې یې د لیزري وسلو ترڅنګ درنې وسلې کارولې دي.

دوی زیاتوي چې پنځه ټوپکونه، یو راکټ لانچر او نور تجهیزات یې هم ترلاسه کړي.

د ټي‌ټي‌پي په وینا، برید د هغو طالب وسلوالو د غچ اخیستنې لپاره شوی چې په شمالي وزیرستان کې د یو کمین پر مهال وژل شوي وو.

دوی دغه راز د دغې جګړې پر مهال د خپل یو وسلوال د وژل کېدو خبر هم ورکړی.

د هند حکومت د یوې رسمي اعلامیې له مخې، د هېواد د اردو لوی درستیز ته بشپړ صلاحیت ورکړی چې د اړتیا په صورت کې ټول افسران او ځمکني ځواکونه د پوځ د ملاتړ لپاره راوغواړي.

د دفاع وزارت په حکم کې راغلي چې د اردو ۱۴ قطعې به د هېواد په مهمو سیمو کې لکه سويل، ختيځ، لوېديځ، مرکز، شمال، اندامان او نیکوبار ټاپوګانو کې ځای پر ځای شي.

یاد حکم چې د مې په ۶مه صادر شوی، تر ۲۰۲۸ کال د فبرورۍ تر ۹مې پورې به نافذ وي.

دا پرېکړه داسې مهال شوې چې د هند او پاکستان تر منځ پوځي تاوتریخوالی ورځ تر بلې ډېرېږي.

د پاکستان د دفاع وزیر خواجه محمد آصف ویلي، چې اسلام‌آباد له نهم سپتمبر ۲۰۰۱ وروسته د افغانستان د جګړې پر مهال له ترهګرو ملاتړ کړی دی.

هغه له سي‌ان‌ان سره په مرکه کې دا هم منلې چې د امریکا له خوا د شوروي ضد جګړه کې د پاکستان ملاتړ یوه تېروتنه وه.

آصف د امریکا په دوه‌ګوني چلند نیوکه کړې او ویلي یې دي، چې واشنګټن د خلکو نومونه د ترهګر یا غیر ترهګر په توګه ټاکي یا یې باسي.

اصف د سراج‌الدین حقاني نوم له تور لیسته د لرې کولو په اړه ویلي: «دوه یا درې میاشتې مخکې د حقاني د نیولو لپاره جایزه اعلان شوې وه، اوس نه یوازې دا چې نوموړی آزاد دی، بلکې جایزه هم لغوه شوې. اوس پوښتنه دا ده چې څوک پرېکړه کوي څوک ترهګر وي او څوک نه؟»

هغه دا څرګندونې داسې مهال کړې، چې د هند او پاکستان ترمنځ نښتې دوام لري او دواړه لوري یو بل ته د زیانونو اړولو ادعا کوي.

د هند کرکټ بورډ له پاکستان سره د جګړې له کبله د آی‌پي‌ایل پاتې سیالۍ وځنډولې.

ای‌سي‌سي د هند کرکټ بورډ له قوله ویلي، چې دا سیالۍ به تر بلې خبرتیا پورې ځنډېدلې وې.

د یادونې ده، چې تېره شپه د چینای او پنجاب ترمنځ سیالۍ نیمه کې لغوه شوه او نن کرکټ بورډ پرېکړه کړې، چې ټولې لوبې تر بلې خبرتیا پورې ځنډول شوې دي.

د افغان سولې لپاره د امریکا ځانګړي پخواني استازي زلمي خلیلزاد له هند مننه کړې، چې پر پاکستان شویو بریدونو کې یې د جیش العدل ډلې مشر عبدالروف اظهر وژلی.

نوموړي ویلي، اظهر په ۲۰۲۲ کال کې د وال سټریټ ژورنال خبریال په قتل رسوولی وو او اوس عدالت پلي شو.

راپورونه وايي، چې اظهر د هند له لوري پر پاکستان د سندور عملیاتو پر مهال وژل شوی دی.

د هند لومړي وزير نریندرا مودي له لوړپوړو چارواکو سره په يوه ځانګړې غونډه کې د بيړني حالت د احتمالي پېښو په وړاندې د بشپړې تيارۍ امر کړی دی.

په دې غونډه کې د ملکي دفاع پر پياوړتيا، د جعلي معلوماتو پر وړاندې مبارزه او د مهمو زېربناوو خونديتوب باندې بحث شوی دی.

دا په داسې حال کې ده چې د تېرو څو ورځو راهیسې هند او پاکستان پر یو بل بریدونه کوي او ګڼو خلکو ته مرګ ژوبله پکې اوښتې.

د امریکا مرستیال ولسمشر جي‌ډي ونس له هند او پاکستان څخه غوښتي چې خپل کړکېچ کم کړي.

نوموړي ویلي، که څه هم واشنګتن د تاوتریخوالي کمولو هیله لري؛ خو نه شي کولای دا دوه اتومي هېوادونه کنټرول کړي.

ونس زیاته کړې، چې د اسلام اباد او نوي ډهلي جګړه دوی پورې اړه نه لري.

د کاتولیک کلیسا په دوه زره کلن تاریخ کې لومړی امریکایي پاپ، کاردینال رابرت پرووست، د څوارلسم لئوی» په نوم وټاکل شو.

نوموړی چې د مذهبي خدمت ډېره برخه یې په پېرو کې تېره کړې، د نن ماښام د سیسټین کلیسا له دودکشه د سپین دود له راپورته کېدو سره، د نړۍ د کاتولیکانو د رهبر په توګه اعلان شو.

پِرووست چې پاپ فرانسس په ۲۰۲۳ کال کې د اسقفانو د ځواکمن دفتر مشر ټاکلی و، د کلیسا د مشرتابه لپاره یوه مهمه څېره ګڼل کېده.

دا دفتر د نړیوالو اسقفي نوماندانو د معرفي کولو مسؤلیت لري.

پخواني ولسمشر محمد اشرف غني ویلي، د افغانستان اسلامي جمهوري نظام د سقوط ترمخه د پرلپسې معلوماتي بریدونو لاندې و، چې ځینو رسنیو او شبکو په لوی لاس د نظام د بدنامۍ لپاره ناسم او تحریف شوي معلومات خپرول.

نوموړي دا څرګندونې په خپل تازه پودکاست کې کړې، چې مخابراتي موضوعاتو ته ځانګړی شوی.

هغه ویلي، دغو شبکو هڅه کوله د ملي ځواکونو روحیه زیانمنه کړي، خلک د نظام پر ضد راوپاروي او ولسي ذهنیت بدل کړي.

ښاغلي غني زیاته کړې د ناسم، فاسد او تخریبي معلوماتو یوه پراخه شبکه فعاله وه، چې په زرګونو پیغامونه یې د ملي ځواکونو پر ضد خپرول.

نوموړي همداراز ویلي، که څه هم په هېواد کې د بیان ازادي موجوده وه؛ خو ډېری رسنیو له مثبتې ازادۍ ناوړه استفاده کوله، د ملي یووالي پر ضد یې فعالیت کاوه، او د ولس او حکومت ترمنځ یې بې‌باوري زیاتوله.