حماس د امریکا د پخواني ولسمشر ډونالډ ټرمپ وروستی خبرداری، چې له دې ډلې یې د ټولو یرغمل شویو د سمدستي خوشې کولو او د وژل شویو کسانو د جسدونو د بېرته سپارلو غوښتنه کړې، د اسرائیل د جګړې د دوام لپاره هڅونه وبلله.

ټرمپ حماس ته خبرداری ورکړی چې یا ټول یرغمل شوي کسان همدا اوس ازاد کړئ او د وژل شویو جسدونه وسپارئ، یا هر څه پای ته ورسېدل.

ټرمپ همداراز د غزې خلکو ته په خطاب کې ویلي: “ستاسو لپاره یو ښکلی راتلونکی شته، خو که یرغمل شوي کسان وساتئ، نو مړه یاست.”

د حماس او اسرائیل د استازو ترمنځ د اوربند د دویم پړاو خبرې، چې د مصر په منځګړیتوب د دې اوونۍ له پیل راهیسې روانې وې، د اختلافاتو له امله عملاً درېدلي دي.

د روسیې د بهرنیو چارو وزیر سرګي لاوروف د فرانسې د ولسمشر امانوئل مکرون هغه څرګندونې ګواښ وبللې، چې ویلي یې وو، د فرانسې اتومي چتر به د اروپا د دفاع لپاره پراخ شي.

لاوروف زیاته کړې، دا چې فرانسه روسیې ته د یوه ګواښ په سترګه ګوري او د اتومي وسلو د کارولو خبرې مطرح کوي، دا زموږ لپاره ښکاره ګواښ دی.

د مکرون له څرګندونو مخکې، د روسیې د بهرنیو چارو وزارت ویاندې ماریا زاخارووا هم ویلي وو، چې د فرانسې ولسمشر داسې خبرې کوي، چې له واقعیت سره تړاو نه لري.

د یادونې ده چې ایمانویل مکرون په یوه ټلویزیوني وینا کې ویلي و، چې هېواد یې نه یوازې د خپلې دفاع، بلکې د ټولې اروپا د ساتنې توان لري.

هېره دې نه وي، چې فرانسه یوازینی اروپایي هېواد دی، چې اتومي وسلې لري.

د طالبانو حکومت تر واک لاندې د افغانستان بانک وایي، چې له دې وروسته به د افغان حاجیانو ټول مالي لګښتونه یوازې په افغانیو اخیستل کیږي.

یاد بانک د یوې خبرپاڼې په خپرولو سره ویلي، چې د افغانیو پر ثبات د مثبتې اغېزې لپاره دا پرېکړه له اړوندو ادارو سره یې کړې.

خبرپاڼه کې ویل شوي، چې افغانۍ زموږ د ملي هویت برخه ده چې په راکړه ورکړه کې کارونه یې د ملي اقتصاد د ودې لپاره یو اساسي ګام او د ټولو افغانانو ګډ ملي مسؤلیت دی.

د طالبانو حکومت د کډوالو او بیرته راستنېدونکو چارو وزیر مولوي عبدالکبیر له پاکستاني دیپلومات عبیدالرحمان نظاماني سره په لیدنه کې ویلي، چې د تورخم دروازې تړل، جګړه او تاوتریخوالی د ستونزو حل نه‌ دی.

مولوي کبیر ټینګار کړی، چې د تورخم دروازې د بندېدو له امله د دواړو خواوو سوداګرو او مسافرو ته درانه مالي زیانونه اوښتي او باید دا لار ژر تر ژره بېرته پرانیستل شي.

نوموړي ویلي، چې د طالبانو حکومت د ګاونډیو هېوادونو لپاره ستونزې نه جوړوي، بلکې غواړي له ټولو سره ښې اړیکې ولري او همکاري پراخه کړي.

هغه له پاکستان او ایران غوښتنه کړې، چې له افغان کډوالو سره دې انساني، اسلامي او د نړیوالې کډوالۍ اصولو مطابق چلند وشي.

د پاکستان پوځ ویلي، چې ټي‌ټي‌پي د خیبر پښتونخوا د بنو سیمې پر یوې نظامي اډې برید د افغانستان له خاورې تنظیم کړی دی.

د پاکستان پوځ همداراز ویلي چې افغان اتباع په فزیکي توګه په دې برید کې ګډون درلود.

پاکستان خبرداری ورکړی چې د سرحدي ګواښونو د دفع کولو لپاره د اړتیا وړ اقداماتو حق لري.

د پاکستان د پوځ په وینا، د بنو په برید کې ۳۴ کسان وژل شوي، چې ۵ یې پوځیان، ۱۳ ملکیان، او ۱۶ د پاکستاني طالبانو غړي دي، چې ۴ یې انتحاري بریدګر وو.

پاکستان ادعا کوي چې د طالبانو حکومت پاکستاني طالبانو ته پناه ورکړې او ورسره همکاري کوي، خو د طالبانو حکومت وايي چې د پاکستان ناامني د همدې هېواد له داخلي ستونزو سرچینه اخلي.

په پام کې ده، چې د ناټو سازمان غړي هېوادونه نن په بروکسل کې غونډه وکړي.

دا غونډه وروسته تر هغې کېږي، چې زیلنسکي سره د ټرمپ له لفظي شخړې وروسته یاد سازمان د اوکراین ملاتړ وکړي.

دا غونډه داسې مهال کېږي، چې ټرمپ واک ته له بیا رسېدو سره سم ویلي، چې ناټو سازمان باید دفاعي برخه کې خپلې مرستې زیاتې کړي.

د امریکا د ملي امنیت سلاکار مایکل والتز وایي، چې د بایډن د درې کالو کار یې یوه میاشت کې وکړ.

نوموړی زیاتوي، بایډن درې کالو کې ونه توانېد، چې کابل کې د دوی پر سرتېرو د برید طراح ونیسي؛ خو دوی په یوه میاشت کې دا چاره ترسره کړه.

د یادونې ده چې پر دغه برید تورن محمد شریف الله تېره ورځ امریکا ته لېږدول شوی او ویرجینیا کې یې محاکمه کېږي.

د امریکا ولسمشر ډونالډ ټرمپ ګواښ کړی، چې که حماس غورځنګ اسرائیلي بندیان او جسدونه ونه سپاري؛ نو د هغوی لپاره به غزه کې هرڅه پای ته ورسېږي.

هغه یوه اعلامیه کې ویلي، چې حماس باید ژر تر ژره دا اقدام وکړي.

بل لورته بیا حماس اسرائیل ملامتوي، چې د اوربند ټولې هوکړې یې نه دي عملې کړې.

د پاکستان له لوري امریکا ته د کابل پر نړیوال هوایي ډګر د برید طراح د سپارلو په اړه د ملي امنیت پخواني رییس رحمت الله نبیل لیکلي، دا چاره ثابتوي، چې د افراطي ډلو مدیریت او دوی ته جهت ورکول د پاکستان پټې سټراتیژۍ دي.

نبیل ویلي، له سړې جګړې وروسته پاکستان د نیابتي جګړو د اجارې اخیستلو له پالیسي څخه د یوې سترې عایداتي سرچینې په توګه ګټه پورته کړې.

د هغه په خبره، په ۲۰۲۱ کال کې د طالبانو بیا راوستلو پاکستان ته کومه ګټه ونه کړه او دوی دا اړتیا حس کړه، چې په سیمه کې یوه نوې جبهه پرانیزي.

نوموړی وایي، پاکستان د داعش مرکزونو په ایجاد سره غواړي له یو لوري له امریکا څخه امتیاز واخلي او له بل لوري پر طالبانو فشار راوړي.

د طالبانو استخباراتو اړوند المرصاد ادعا کړې، چې محمد شریف الله د کابل د هوایي ډګر د برید اصلي طراح نه دی.

المرصاد ویلي، چې محمد شریف‌الله د داعش خراسان له اعلان وروسته له دې ډلې سره یو ځای شوی و او د افغانستان د پخواني حکومت استخباراتو په ۲۰۱۹ کې نیولی و، چې بیا د ۲۰۲۱ کال د اګست په میاشت کې له زندان څخه تښتیدلی وو.

یادې رسنۍ زیاته کړې، چې محمد شریف‌الله د داعش په لیکو کې د انجنیر شریف، جعفر او اجمل په نومونو هم مشهور و او د دې ډلې امنیتي مسوولینو ته یې لارښوونه کوله.

المرصاد دغه راز ویلي، طالبانو په ۲۰۲۳ کال د اپرېل په میاشت کې د داعش دوه مشران، عبدالله کابلی او ډاکټر حسین، په هرات کې ووژل، چې د دوی له وژنې وروسته امریکا ادعا وکړه چې دغه کسان د کابل هوایي ډګر د برید طرح کوونکي وه.

المرصاد تور پورې کړی، چې د ټرمپ اداره او پاکستان د کابل هوایي ډګر د برید په تړاو د محمد شریف‌الله بې ځایه تبلیغات کوي.

د المرصاد په خبره، د محمد شریف‌الله نیول کېدل د داعش-خراسان څانګې د پټنځایونو شتون د پاکستان دننه تاییدوي.

د یادونې ده چې تېره ورځ پاکستان امریکا ته د ۲۰۲۱ کال د کابل هوایي ډګر مخته د برید طراح سپارلی او دغه کس امریکا ته انتقال شو.