حماس ویلي، چې اسرائیل په لوی لاس غواړي د غزې اوربند مات کړي.
د اسرائیل یو لوړ پوړي چارواکي ویلي، د شپږو اسرائیلي بندیانو له خلاصون وروسته، اسرائیلو د فلسطینیانو د ازادولو پروسه ودروله او دا کار په لوی لاس د اوربند ماتول دي.
د حماس یو چارواکي باسم نعیم ویلي، اسرائیل باید هوکړې ته غاړه کېږدي.
د هېواد پخواني ولسمشر حامد کرزي د جاپان له سفیر تاکایوشي کورومیا سره کتلي.
ښاغلي کرزي په خپله ایکسپاڼه لیکلي، چې په دې لیدنه کې د افغانستان او جاپان ترمنځ د همکاریو او دوه اړخیزو اړیکو د پیاوړتیا په اړه خبرې وشوې.
حامد کرزي په دې لیدنه کې جاپان د افغانستان تاریخي او ښه دوست بللی او د دغه هېواد له مرستو، په ځانګړي ډول د تعلیم، روغتیا، او بېځایه شویو کډوالو ته د رسیدګي په برخو کې مننه کړې.
د ازادۍ جبهې اعلان کړی چې د بګرام هوايي ډګر د څلورمې دروازې مخې ته یې په برید کې درې طالبان وژلي او دوه نور یې ټپیان کړي دي.
دغې جبهې ویلي چې دا برید یې د شنبې په ماښام کړی.
دغې جبهې زیاته کړې، چې دا عملیات بریالي وو؛ خو نور جزئیات یې نهدي ورکړي.
د طالبانو حکومت تر اوسه په دې اړه څه نه دي ویلي.
د طالبانو حکومت اقتصادي مرستیال ملا عبدالغني برادر ازبېکستان کې له یو شمېر افغان سوداګرو او پانګوالو سره کتلي دي.
نوموړي دغه لیدنه کې ویلي، چې اوس مهال افغانستان کې له څو لسیزو را وروسته امن راغلی او د اقتصادي ودې او پرمختګ لپاره غوره فرصت رامنځته شوی.
د برادر په خبره، د افغانستان له سیستم بیروکراسي او فساد ورک شوی دی او د بهرنیو او کورنیو پانګوالو لپاره غوره فرصت رامنځته شوی.
د کډوالو په چارو کې د ایران د کورنیو چارو وزارت دفتر رییس او د دغه وزارت د وزیر سلاکار نادر یار احمدي وايي، چې غیر قانوني افغان کډوال به تر دې وروسته په ایران کې پاتې نشي.
نوموړی زیاتوي، د کډوالو د سرشمېرنې لپاره همدا سږکال وخت دی او تر دې وروسته دا سرشمېرنه پای ته رسېږي.
د نوموړي په باور، دا کار ایران ته ګټه رسوي، ترڅو ټول غیر قانوني کډوال معلوم او بېرته خپلو هېوادونو ته ولېږي.
احمدي دغه راز وايي، چې ۹۹ سلنه کډوال په ایران کې پېژندل شوي دي.
له تېرې ورځې راهیسې پاکستاني لوري د تورخم لار تړلې، چې دواړو غاړو ته یې سلګونه ناروغان، مسافر او بار وړونکي موټر ایسار دي.
په ورته مهال بیا د تورخم کمیسار عبدالجبار حکمت وايي، هڅه کوي چې پاکستاني لوري سره دا ستونزه د خبرو له لارې حل کړي.
پاکستان دا لاره وړمه شپه شاوخوا لس بجې د فرضي کرښې دې غاړې ته د تاسیساتو جوړولو له کبله تړلې وه.
د طالبانو حکومت تر واک لاندې د افغانستان بانک سرپرست نور احمد اغا د ازبېکستان بانک له رییس تیمور اشمتوف سره کتلي، چې د بانکي لېږدونو پر اسانتیاو، وړتیا لوړولو، د دواړو هېوادونو د ملي اسعارو پر کارولو او د ادینو د سیسټمونو پر نښلولو او پراختیا یې خبرې کړي دي.
نور احمد اغا په دې لیدنه کې ویلي، چې د بانکي خدماتو پراختیا کولای شي، چې د دواړو هېوادنو ترمنځ سوداګریزې اړیکې هم پراخې کړي.
دا لیدنه داسې مهال کېږي، چې د طالبانو حکومت اقتصادي مرستیال ملا عبدالغني برادر هم د یو لوړ پوړي پلاوي په مشرۍ دغه هېواد ته سفر کړی.
د فرانسې په مولوز ښار کې یو تن د چاقو په ګزارونو سره وژل شوی دی.
ویل کېږي، چې برید د یو ۳۷ کلن سړي له لوري په پولیسو شوی؛ خو یو پرتګالي وګړي چې د مداخلې هڅه کړې، پکې خپل ژوند بایللی، پېښه کې پنځه پولیس ټپیان شوي، چې درې یې سطحي او د دو تنو ټپونه یې ژور دي.
فرانسوي چارواکي وايي، چې بریدګر تر دې وړاندې هم د ترهګریزو ګواښونو له کبله تر څار لاندې وو او دوی څو ځله هڅه وکړه، چې دا کس خپل هېواد الجزایر ته انتقال کړي؛ خو هغوی یې له منلو ډډه کړې.
هرات کې له ایران سره پر پوله صفري نقطه کې یو تن د یخ له کبله وژل شوی دی.
سیمهییزې سرچینې وايي، چې یاد کس غوښتل له پولې تېر شي؛ خو د یخنۍ له کبله وژل شوی.
یاد کس محسن نومېده، چې د غور د لعل سرجنګل ولسوالۍ اوسېدونکی وو.
سیمهییزو مسولینو ویلي، چې د نوموړي کس د سرحدي ځواکونو د لسمې لواء دریم کنډک ځواکونو له لوري موندل شوی دی.
د ایران د بهرنیو چارو وزیر عباس عراقچي وايي، چې د افغانستان له لوري د اوبو تړون نه دی عملي شوی.
هغه له افغانستان سره د ایران له ګاونډیو ولایتونو غوښتي، چې په دې اړه له خپلو ګاونډیو افغان ولایتونو سره همغږي وکړي.
نوموړي زیاته کړې، چې د هلمند په سیند کې د دوی حقابه په بشپړ ډول نه ده ورکړل شوې.
عراقچي ویلي، باور لري، چې دواړو لوریو ته د هم سرحده ولایتونو د همغږۍ له لارې به دا ستونزه په ښه ډول حل شي.