جهادي مشر شیخ الحدیث والقران استاد عبدالرب رسول سیاف وایي، چې د طالبانو حکومت له لوري په جوړېدونکې لویه جرګه کې یوازې طالبان او د دوی پلويان راغوښتل کېږي.
هغه ویلي، دا چاره نه یوازې دا چې د ملت درد نشي دوا کولای؛ بلکې د دغې دودیزې لویې جرګې یو ډول سپکاوی او دې جرګې ته په کم نظر کتل هم بلل کېدی شي.
تر دې وړاندې یو شمېر راپورونه خپاره شوي، چې د طالبانو حکومت مشر شیخ هبتالله اخندزاده غواړي په هېواد کې یوه لویه جرګه راوبولي.
د جمهوري حګومت پخوانی مرستیال محمد یونس قانوني وايي، روان کال د بدلون نښې نښانې لیدل شوې او دا کال به په افغانستان کې د بدلون کال وي.
هغه د مارشال فهیم د تلین په مناسبت یوې غونډې ته ویلي، چې ښايي دا بدلون یا دننه او یاهم د افغان ولس، نړیوالې ټولنې او سیمې سیاسي بهیر له لارې رامنځته شي.
په ورته مهال په دې غونډه کې د کورنیو چارو پخواني وزیر ویس احمد برمک ویلي، چې د افغانستان ولس نور په پخوانیو چارواکو کوم باور نه لري.
د هغه په خبره، د خلکو باور ختم شوی او دوی اوس د ګټورې رهبرۍ په خلا کې قرار لري.
په همدې حال کې یادې ناستې ته فوزیه کوفي ویلي، سیاسي مشران لاهم انتظار باسي، چې نړۍ به د افغانستان لپاره یو څه وکړي او په خبره یې چې دا په واقعي معنی مایوسه کوونکی حالت دی.
هغې ویلي، ټول اختلافونه باید یوې خواته شي او په رېښتینې ډول باید ټول د افغان ولس لپاره ودریږو.
فاکس نیوز ویلي، چې د امریکا د ملي اطلاعاتو د مشرې تولسي ګابارد هغه معلومات ریښتیا شوي، چې ویلي وو، په سوریې به القاعده پورې تړلې ډلې واک پیل کوي.
فاکس نیوز او رویټرز په یو ګډ راپور کې ویلي، چې د القاعده اړوند ځواکونه چې له احمد الشرع سره همغږي دي، سوریه کې د لږکیو په قتل کې پراخ لاس لري.
دغه راپور کې یادې ډلې د علوي او په سوریه کې د مسیحي ټولنو په وژلو تورنې شوې دي.
د یادونې ده، چې ګابارد د امریکا سنا مجلس ته ویلي وو، چې دا له دې کرکه لري چې د امریکا مشران له افراطي اسلام پالو سره اړیکه لري.
د طالبانو حکومت د پوهنې وزارت د تضمین کیفیت مرستیال عبدالخالق صادق ویلي، چې افغانستان کې د ښوونځیو کمیت زیات؛ خو کیفیت یې ټیټ دی.
هغه ویلي، چې دوی هڅه کوي د کیفیت د لوړولو لپاره کار وکړي.
نوموړي زیاته مړې، که واخان کې هم یو تن ته د زدهکړو زمینه برابره نه وي؛ نو کابل او کندهار کې پر دوی دردیږي.
صادق خان دا څرګندونې داسې مهال کوي، چې له تېرو نږدې څلورو کالو راهیسې افغانستان کې له شپږم ټولګي پورته د نجونو پرمخ ښوونځي تړل شوي دي.
د طالبانو حکومت د ازموینې ملي ادارې مشر او د لوړو زدهکړو وزارت پخواني سرپرست وزیر عبدالباقي حقاني ویلي، چې عصري علوم د ټولنې اړتیا او د یو هېواد د پرمختګ اساسي علت دی.
هغه نن د پوهنې وزارت اړوند یوې خبري غونډې ته ویلي، چې د یو هېواد پرمختګ په دوو شیانو کې نغښتی دی، چې یو یې عصري علوم او بل یې اهل ته د کار سپارل دي.
نوموړی دا څرګندونې داسې مهال کوي، چې له نږدې څلورو کالو راهیسې هېواد کې د ښځو پر وړاندې د عصري علومو دروازې تړل شوې دي.
د قرغیزستان او اذربایجان یو شمېر چارواکو ویلي، چې دوی د افغانستان په کانونو کې د پانګونې لپاره لېواله دي.
د قرغیزستان د کانونو وزارت پخوانی معین، او د اذربایجان د کانونو وزارت پخواني معین، ازر شکوروف د طالبانو حکومت د کانونو او پټرولیم وزارت له سرپرست، هدایتالله بدري سره کتلي او ویلي یې دي، چې هېوادونه یې د افغانستان په کانونو په ځانګړي ډول د نفتو برخه کې پانګونې ته لېوالتیا لري.
طالب لوري بیا یادو کسانو ته د اسانتیاوو ډاډ ورکړی.
ټاکل شوې چې په افغانستان کې د ملګرو ملتونو د سیاسي استازولۍ مشره، روزا اتونبایوا نن د افغانستان په اړه د ملګرو ملتونو امنیت شورا ته د افغانستان په اړه وینا وکړي.
نوموړې دا وینا د افغانستان پر وخت د شپې یوولس بجې کوي.
اتونبایوا په داسې حال کې د افغانستان په اړه غږیږي، چې د طالبانو حکومت تر دې وړاندې د یوناما فعالیت منفي ارزولی او ویلي یې دي، چې دوی د طالبانو د حکومت پر مثبتو کړنو سترګې پټوي؛ خو کوچني منفي مسائیل بیا په قصدي ډول لوی ښيي.
رویټرز د یو شمېر سرچینو په حواله راپور ورکړی، چې روسي ځواکونه په دې هڅه کې دي، ترڅو اوکرایني ځواکونه له کورسک څخه وباسي.
د سرچینې د معلوماتو له مخې، د روسیې دفاع وزارت په کورسک کې د اوکرایني خواکونو پر وړاندې پراخ عملیات پیل کړي دي.
رویټرز ویلي، چې تېره یکشنبه د اوکراین په لویدیځ ورسک کې هم روسیي ځواکونو درې نورې نوې سیمې نیولې دي.
دا په داسې حال کې ده، چې دمګړی امریکا د یادې جګړې د ختمولو هڅه کوي.
د امریکا ولسمشر ډونالډ ټرمپ وايي، له اوکراین سره یې د معلوماتو تبادله ځنډولې او تمه لري، چې په سعودي عربستان کې به خبرې مثبتې پایلې ورکړي.
نوموړي د یکشنبې په ورځ د یوې پوښتنې په ځواب کې، چې ایا کییف سره یې د معلوماتو تبادله درولې؛ ویلي، چې تقریبا دا کار یې لغوه کړی.
بل لورته یو شمېر امریکايي چارواکي وايي، چې سپینې ماڼۍ دا کار پر زیلنسکي د فشار لپاره کړی، ترڅو نوموړی د اوکراین د سولې لپاره له ټرمپ سره همکاري وکړي.
د یادونې ده، چې له اوکرایني چارواکو سره د خبرو لپاره د امریکا د بهرنیو چارو وزیر مارکو روبیو سعودي عربستان ته هم تللی.
د امریکا د بهرنیو چارو وزیر مارکو روبیو ویلي، امریکا کې دې د هغو کسانو دایمي ویزې او ګرین کارتونه لغوه شي، چې د حماس ملاتړ کوي.
نوموړي ویلي، چې یاد کسان باید له امریکا څخه هم و اېستل شي.
هغه د خپلې سناتورۍ په دوره کې هم ویلي و، چې امریکا باید د حماس د ملاتړ کوونکو ګرین کارتونه لغوه کړي.
په همدې حال کې بیا د امریکا فدرال حکومت ویلي، هغه فلسطیني محصل یې هم نیولی، چې د کلمبیا پوهنتون کې یې د اسرائیل پر ضد په شوي لاریون کې کلیدي رول درلود.