د چین د بهرنیو چارو وزیر وانګ يي وايي چې روسیه یې همېشنۍ ملګرې ده او هیڅ وخت دوی د یو بل دوښمنان نه شي کېدی.
هغه مسکو ته د خپل سفر په ترڅ کې د روسیې او امریکا د اړیکو بېرته عادي کېدو څخه هم هرکلی کړی دی.
وانګ يي د روسیې RIA دولتي خبري اژانس سره په یوه مرکه کې ویلي، چې دوی د تل لپاره ملګري، هېڅکله دښمنان نه دي او په لوړه کچه د ستراتیژیکو همکاریو د پرمختګ لپاره د یوه قوي قانوني اساس په توګه کار کوي
د امریکا د بهرنیو چارو وزارت ویانده تمي بروس وایي، د طالبانو له لوري د فای هال ازادول دا څرګندوي چې طالبان د ترمپ حکومت ته ژمن دي، ترڅو ټول امریکایي بندیان ور ازاد کړي.
نوموړې وایي، ترهغې چې طالبان ټول امریکایي بندیان ازاد نه کړي، امریکا لاس تر زنې نه کېني.
د یادونې ده چې څو ورځې وړاندې فای هال د قطر په منځګړیتوب ازاد شو.
ملګرو ملتونو کې د ایران استازولي د یاد سازمان له امنیت شورا او انتونيو ګوترېش غوښتي چې د ایران پر وړاندې د ټرمپ ګواښوونکو څرګندونو ته جدي غبرګون وښیي.
یادې استازولۍ د ملګرو ملتونو امنیت شورا ته یو لیک کې لیکلي، چې دا ډول بې پروا څرګندونې د بشري حقونو ښکاره نقض دی.
لیک کې راغلي، چې د ټرمپ څرګندونې د ملګرو ملتونو د منشور څلورمې مادې خلاف دي.
د یادونې ده چې تېره ورځ ټرمپ ایران ته ګواښ وکړ چې یا توافق وکړئ او یا به بمبار شئ.
د ایران د رهبر مشاور علي لاریجاني ویلي، که امریکا یا اسرائیل پر ایران برید وکړي؛ نو دوی مجبور دي چې اټوم بم تولید کړي.
نوموړی وايي، ایران وړتیا لري؛ خو اوس د رهبرۍ پرېکړه دا ده، چې د اټومي وسلو د تولید پر لور نه ځي.
هغه زیاتوي، امریکا سهوه کوي، چې په دې برخه کې پر ایران فشار واردوي.
دا په داسې حال کې ده، چې په دې وروستیو کې د اټومي وسلو پر سر د ایران او امریکا اړیکې ترینګلې شوې دي.
د اسرائیل پوځ اعلان کړی، چې بیروت کې یې د یو برید پر مهال د حزب الله مهم غړی وژلی.
له پوځ څخه خپره شوې خبرپاڼه کې راغلي، چې یاد کس په دې وروستیو کې حماس ته پر اسرائیل د برید په اړه طرحه ورکړې وه.
خبرپاڼه کې راغلي، چې یاد کس یو بېړنی ګواښ هم بلل کېده.
تر اوسه د وژل شوي کس په اړه زیات معلومات نه دي ورکړل شوي.
د پوهنې وزارت پخوانی وزیر میرویس بلخي وايي، طالبانو د مدرسو په زیاتېدو سره افغانستان د پاشل کېدو لوري ته روان کړی.
هغه یوې مقاله کې ویلي، چې دې ډلې مدرسې زیاتې کړې؛ د ښوونځي رسمي لباسونه یې د مدرسو په لباسونو بدل کړي او د هغو استادانو د ګمارلو لړۍ یې روانه کړې، چې دیني مدرسو کې یې درس ورکړی.
نوموړی زیاتوي، چې دا چاره به د نړۍ او افغانستان امن ته خطر وي.
د هغه په خبره، طالبان د عصري زدهکړو مخالف دي او دا کار د خپل جنګي ماشین فعال ساتلو او خپل نظام د بقا لپاره ترسر کوي.
د طالبانو حکومت د یو سرتیري له قوله خپاره شوي سندونه ښایي چې د بلخ والي محمد یوسف وفا د دغه ولایت په لوړو بستونو کې خپل انډیوالان او خپلوان مقرر کړي.
د احمد الهام په نوم دغه طالب سرتېری د یوسف وفا د خبرو یوه نمونه هم د دغو سندونو سره خپره کړې چې یوسف وفا اختریز پیغام کې په ډېر جوش و خروش ویلي وو: «دا نظام په وینو ولاړ دی، په دې نظام ککرۍ تللې دي، دا نظام په ککریو راغلی دی.»
یاد طالب سرتیري د یوسف وفا د خبرو معکوس انداز ته لیکلي:
«زه هیچا ته اجازه نه ورکوم چې د بلخ ولایت کې خپل او مسلکي اشخاص وګمارئ. ټول به زما ملګري په بستونو کې ځای پر ځای کېږي.»
بل لور ته د طالبانو د ټولنیزو رسنیو فعال جنرال مبین یوسف وفا ته لیکلي: «زه پوی نشوم چې څوک یادوي او چاته اخطارونه ورکوي؟»
نوموړي لیکلي دا خلک لمانځه ته راغلي مه یې ډاروه، او دا حق هم نه دربخښو چې په نیمګړتیاوو دې سترګې پټې کړو.
کونړ ته د چکر لپاره تللي ځوانان د طالبانو لخوا په مرمیو ویشتل شوي او وژل شوي دي.
د عیسا خان په نوم یو ځوان په خپله فیسبوک پاڼه د خپل ورور ډاکټر سبحان الله په نوم چې له هېواده بهر د طب پوهنځي د اخیري کال محصل و، لیکلي: دغه ورور مې د اختر په ورځ کونړ ته د راغلو ټوپکوالو«طالبانو» لخوا شهید کړی شو.
د دې ترڅنګه چې یو بل ځوان هم کونړ ته د چکر سیمې ته تللی و هم د طالبانو لخوا وژل شوی دی.
د طالبانو ځایي مسولینو تر اوسه په دې تړاو څه نه دي ویلي.
د پاکستان لومړي وزیر شهباز شریف ویلي، چې د ګڼ شمېر هېوادونو مشرانو سره یې د اختر مبارکي کړې.
هغه د هغو هېوادونو لیست خپور کړی، چې له مشرانو سره یې د اختر مبارکي کړې؛ خو د طالبانو د مشر نوم په کې نشته.
دا په داسې حال کې ده، چې د طالبانو مشر ځان ته د امر المومنین خطاب کوي.
د ملي امنیت پخواني رئیس رحمت الله نبیل د لوږې په اړه د ملاهبت الله اخوندزاده خبرې استخباراتي بللې او ویلي یې دي، چې هغه د خلکو د غږ خاموشولو هڅه کوي.
ښاغلي نبیل نوموړی تورن کړی، چې عدالت نه پلي کوي او قدرت کې د پاتې کېدو لپاره د نظام د استحکام هڅه کوي.
نوموړي ویلي، د هبت الله دا څرګندونې له دین سره ټکر کې دي او دوی نه یوازې دا، چې د دین استازي نه دي، بلکې د استخباراتي کړیو لاسپوڅي هم دي.
د یادونې ده چې د اختر په غږیز پیغام کې ملاهبت الله ویلي وو، چې فقر د الله له لوري دی او باید صبر پرې وشي.