د روسیې ولسمشر ولادیمیر پوتین د سه‌شنبې په ورځ ۱۶۰ زره نارینه چې عمرونه یې د ۱۸ او ۳۰ کلونو ترمنځ دي، اجباري عسکري خدمت ته وروبلل.

دا د ۲۰۱۱ کال راهیسې د عسکري خدمت تر ټولو لوی فراخوان ګڼل کېږي.

دغه اقدام د روسیې د نظامي ځواکونو د پراخولو د برخې په توګه ترسره شوی دی.

دا پسرلنی عسکري فراخوان د یو کال خدمت لپاره اعلان شوی.

دا په داسې حال کې ده چې څو میاشتې وړاندې پوتین اعلان کړی و چې د روسیې ټول نظامي ځواکونه باید ۲.۳۹ میلیونو ته ورسېږي، او د فعالو سرتېرو شمېر باید ۱.۵ میلیونه ته لوړ شي.

د دې پلان له مخې، په راتلونکو درې کلونو کې به د روسیې نظامي ځواک ۱۸۰ زره نور سرتیري زیات کړي.

دریاسالار ولادیمیر تیملیانسکي، چې د روسیې د نظامي چارو مسؤل دی، ویلي، نوي مشمولان به د اوکراین جګړې ته، چې روسیه یې “ځانګړې نظامي عملیات” بولي، ونه استول شي.

د اوکراین ولسمشر ولادیمیر زلینسکي وایي، ټاکل شوې سبا به د امنیتي تضمین لپاره اوکراین کې د بهرنیو ځواکونو د ځای پر ځای کولو لپاره له یو شمېر هېوادونو سره خبرې پیل کړي.

نوموړي د المان د بهرنیو چارو وزیر سره خبرو کې ویلي، چې کیف په دې اړه د خپلو متحدینو ځواب ته په تمه ده.

د یادونې ده چې اوکراین غواړي بحري، هوایي او ځمکني ځواکونه د دوی خاوره کې مېشت شي.

وال سټریټ ژورنال د یو ایراني چارواکي له قوله ویلي، که امریکا پر دوی برید وکړي؛ نو تهران به په خلیج فارس کې د امریکا نظامي اډې په نښه کړي.

سرچینې ویلي، چې د برید په صورت کې به ان یو یو امریکايي سرتېری هم د دوی لپاره هدف وي.

بل لورته امریکا هم یو شمېر جنګي بېړۍ او تجهیزات منځني ختیځ ته لېږدولي.

وال سټریټ ویلي، چې ښايي د دغو تجهیزاتو لېږدول له ایران سره د جګړې لپاره وي.

رویټرز راپور ورکړی، چې ټرمپ د امریکا روغتیايي بنسټونو څخه د لس زره کارکوونکو د اېستلو لړۍ پیل کړه.

د سرچینې د معلوماتو له مخې، یاد کارمندان له خبرتیا څو ساعته وروسته کارځایونو ته له ورتګ منع شوي دي.

دا کسان د خوړو او درملو، د ناروغیو پر وړاندې د مخنیوي، او ملي روغتیا له بنسټونو اېستل شوي دي.

د یادونې ده، چې ټرمپ تر دې وړاندې هم له یو شمېر بنسټونو کارکوونکي اېستلي دي.

د روسیې د بهرنیو چارو وزارت مرستیال سرګي ریابکوف اعلان کړی، چې دوی اوس مهال نشي کولای، چې د اوکراین جګړې پای ته رسېدو لپار د امریکا شرایط ومني.

هغه ویلي، چې دوی د امریکا وړاندیزونه په جدي ډول نیسي؛ خو اوس نه شي کولای دا جګړه پای ته ورسوي.

نوموړی زیاتوي، چې په دغو وړاندیزونو کې د یادې ستونزې د حل لپاره اساسي ټکي نشته او د روسیې ټولو وړاندیزونو ته په کې په کمه سترګه کتل شوي.

د آلمان د بهرنیو چارو وزارت د یهود ضد دریځ او د تروریزم د ملاتړ په تور د څلورو بهرنیانو د ایستلو پرېکړه وکړه.

په ایستل شویو کسانو کې د اروپایي اتحادیې درې اتباع او د امریکا یو تبعه شامل دي.

یاد فعالان تر ۲۱م اپرېل پورې وخت لري چې آلمان پرېږدي، که نه نو د المان د حکومت له لوري به په زور وایستل شي.

د پښتون ژغورنې غورځنګ مشر منظور پښتین وایي، د ظلم خلاف د دوی د ملي دریځ قوت ځکه ډېر بریالی نه دی، چې خلک ملي احساس په سیمه‌ییز احساس بدلوي.

نوموړی وایي، که یوه سیمه کې ریاست ظلم وکړي؛ نو یوازې د همغې سیمې خلک غږ پورته کوي او د یو څو ورځو له تېرېدو وروسته هر څه بېرته ساړه شي.

د منظور په خبره، پاکستانی ریاست پښتنو ته هیڅ وخت حق نه ورکوي، له دوی سره به هیڅکله انصاف ورنکړي.

نوموړي له پښتنو غوښتي چې یو موټی شي او په هر وګړي او سیمې شوی ظلم پر خپل ورو او خپل کور شوی ظلم وګڼي.

پولټیکو راپور ورکړی، چې هسپانیا کې د طالبانو پخوانی سفیر له خپلې مېرمنې سره یو ځای د جنايي جرمونو په تور په امریکا کې نیول شوی دی.

محمد رحیم واحدي د شنبې په ورځ له ترکیې څخه امریکا ته تر رسېدو وروسته نیول شوی.

د هغه مېرمن، ریم شاکر د امریکا تبعه ده چې د ویرجینیا په سټرلینګ کې اوسېږي.

د یادونې ده،چې د نوموړي دیپلوماتیک مصؤنیت هم د روانې میاشتې پیل کې د جنسي تورونو له کبله لغوه شوی وو.

د حزب اسلامي ګوند مشر ګلبدین حکمتیار وايي، ډېر ژر به د نویو خوشالیو او بریایوو خبرونو واورئ.

هغه خپلو پلویانو ته له ډېرو جزیاتو ورکولو پرته دا خبره کړې ده.

نوموړی دا څرګندونې داسې مهال کوي، چې طالبانو له هغه کار ځای هم اخیستی او له سیاسي فعالیتونو هم منع شوی دی.

بل لورته د نوموړي پر یو ټلویزون هم بندیز لګول شوی.

د روسیې د بهرنیو چارو وزارت مرستیال خبرداری ورکړی، چې پر ایران به برید ناوړه پایلې ولري.

سرګي ریابکوف ویلي، چې دوی دا چاره غندي او نا مناسب اقدام یې بولي.

هغه د تهران په اړه د ټرمپ څرګندونې غندلې دي.

د یادونې ده، چې دې وروستیو کې د واشنګټن او تهران ترمنځ اړیکې کړکېچنې شوې دي.